Yeniyetmələr arasında ikiqat dünya çempionu olan Nihad Məmişov ilk dəfə gənclər arasında Avropa çempionu oldu.

Prosport.Az-ın Bratislavaya ezam olunmuş əməkdaşı ondan müsahibə götürüb.

– Avropa çempionu oldunuz. Nələr hiss edirsiniz?
– İlk dəfə Avropa çempionu oldum. 2 dəfə dünya çempionu olsam da, Avropa çempionatında qızıl medal qazana bilməmişdim. Ancaq bu dəfə kiçik karyeramda ilk dəfə Avropa çempionu ola bildim. İnşallah, bu il dünya çempionatı da var. Bu medal mənə motivasiya verəcək ki, orada da qızıl medal qazanım.

– Finalda zədə aldınız. Amma qayıdıb qalib gəldiniz...
– Finalda uduzub çempionluğu əldən buraxa bilməzdim. İstəmirdim ki, uduzum. Çünki o boyda əziyyət çəkmişdim. Əlimdən gələni etdim ki, Azərbaycanın himni səslənsin.

– 18 yaşınız var. 2 dəfə yeniyetmələrdə dünya çempionu olsanız da, Avropada belə uğuru qazanmamışdınız. Hər dəfə bunu gerçəkləşdirməyə nə mane olurdu?
– Birinci il Avropa çempionatına gedə bilməmişdim. Getdiyim Avropa çempionatında da uğurlu çıxış edə, güləşə bilmədim. Amma ötən il Perudakı dünya çempionatında elə güləşdim ki, həmin Avropa çempionatının acığını çıxdım. Bu Avropa çempionatına ciddi hazırlaşmışdım. Özümə söz vermişdim ki, Avropa çempionu olacağam. Bu da ən böyük arzularımdan biri idi. Şükür Allaha, gerçəkləşdirdim.

– Avropa çempionatının qızıl medalı dünya çempionatınkından kiçik sayılır. Ancaq bunun ilk olduğunu nəzərə alsaq, yəqin medal kolleksiyanda xüsusi yeri olacaq...
– Əlbəttə, sözsüz. Rəqiblərim Avropa çempionu olanda, həmişə onlara həsədlə baxırdım. Düşünürdüm ki, görəsən o hisslər necədir? Dünya çempionluğu hissini dadmışdım, ancaq Avropanınkını yox. Bu il gənclərdə ilk ilimdir. İnşallah, gənclərdə də dünya çempionu olub, sayı üçqata qaldırmaq istəyirəm.

– Bacınız da Nigar Məmişova da cüdoçudur. Ailənizdə başqa da cüdoçu var?
– Əslində bacım mənə baxıb həvəsə gəlib. O da qız olduğundan, tam yaxşı güləşə bilmir, gücü çatmır. Amma pis də deyil. Nə valideynlərim, nə də qardaşım idmançı olmayıb. Qardaşım da təzə cüdoya başlayıb. Sadəcə, 7 yaşım olanda atam dedi ki, gəl səni idmana yazdırım. O vaxtdan bu idmandayam.

Səbuhi Musa
Bratislava