"İmişli"nin qapıçısı Andrey Sinenko son 2 turda qapısında top keçirməyən 2 qapıçıdan biridir (ilk matçda qolu onun yerinə daxil olan qapıçı buraxıb). 1,91 metr boya malik olan 28 yaşlı qapıçı ilk dəfə Azərbaycana millimizin sabiq qapıçısı, 2023/24 mövsümündə I Liqada çıxış etmiş "İrəvan"ın qolkiperlərlə iş üzrə məşqçisi Aleksandr Jidkovun dəvəti ilə gəlib. 

Prosport.Az belaruslu qapıçıdan müsahibə götürüb.

– "Neftçi" ilə oyunda 1 xal qazandınız. Oyunu necə şərh edərdiniz?
– Çətin oyun oldu. "Neftçi" Azərbaycanın statuslu komandasıdır. Bilirdik ki, asan olmayacaq. Ona görə oyuna ciddi hazırlaşmışdıq və rəqibə qarşı layiqincə mübarizə apardıq. Onların da qol imkanları oldu, bizim də.

– Çoxları düşünürdü ki, "İmişli" bu mövsüm autsayder olacaq. Lakin ilk 2 turda iddialı komandalara qarşı oynamağınıza baxmayaraq, layiqli mübarizə apardınız. "Turan Tovuz"a son saniyədə məğlub oldunuz, "Neftçi"dən xal aldınız. Növbəti turda isə "Sabah"la üz-üzə gəlirsiniz...
– Düşünürəm ki, ambisiyalı komanda yığılıb, ambisiyalı rəhbərliyimiz və məşqçilər korpusumuz var. Hər kəs eyni məqsəd üçün vuruşur. Dəqiq deyirəm ki, autsayder olmayacayıq. Biz rəqiblərdən qorxmalı deyilik, qoy onlar bizdən qorxsun.

– Qarşınıza qoyulan əsas hədəf nədir?
– Komandamızın rəhbərliyi və baş məşqçimiz ictimaiyyətə hədəflərimizin nə olduğunu açıqlayıbsa, mənim əlavə nə isə demək səlahiyyətim yoxdur.

– "Turan Tovuz"la oyunda zədə aldınız və sanki ciddi zədəyə oxşayırdı. Ciddi bir şey vardı? Hazırda durumunuz necədir?
– Hər şey qaydasındadır, heç bir problem yoxdur.

– Deyirlər ki, sizin ilk 2 turda seyvləriniz olmasaydı, komanda daha böyük hesabla uduza bilərdi. Öz çıxışınız haqda nə deyə bilərsiniz?
– Şadam ki, komandaya faydam dəyir (gülür). İlk xalımızı götürdük və yolumuza davam etməliyik. Eyni zamanda səhvlərimizi də təhlil edib nəticə çıxarmalıyıq. Təhlil etməliyik ki, niyə bu səhvləri etdik, niyə qapımız qarşısında bu epizodlar yarandı. Təhlil edib çarəsini tapmalıyıq ki, növbəti oyunlarda bunların sayı daha az olsun.

– Keçən mövsüm I Liqada çıxış edirdiniz. Həmin liqa ilə Premyer Liqanı müqayisə edəndə hansı səviyyə fərqi var?
– Təbii ki, Premyer Liqanın səviyyəsi yüksəkdir. Mən Belarus Premyer Liqasında oynamışam. I Liqada Azərbaycanda oynadım və mənim üçün çətin oldu. Çünki hər komandanın özünəməxsus oyun üslubu var idi. Artıq I Liqa keçmişdə qalıb.

– Azərbaycan çempionatında daha öncə də belaruslu futbolçular çıxış edib. "Kəpəz"də kapitan olan Yeqor Xvalko yenicə Azərbaycanı tərk etdi. Yaxın keçmişdə isə karyerasını "Xəzər Lənkəran"da bitirmiş həmkarınız Aleksandr Martyoşkinin adını çəkə bilərik. Onunla tanışlığınız var?
– Əlbəttə ki, var. Martyoşkin məni Minsk "Dinamo"suna götürən şəxsdir. Onunla şəxsi tanışlığımız var, 2 il bir yerdə işləmişik, mənim məşqçim olub. Onun yetirməsi sayılıram. Azərbaycan klubuna ("İrəvan"ı nəzərdə tutur – S.M.) məni məsləhət görən də o olub. "Zirə"dəki Yeqor Boqomolski ilə də Belarusda eyni komandada – "Rux"da (Brest) oynamışıq. Ancaq 2022-ci ildə bu klub dağıldı. Boqomolski "Minsk"ə, mən də bir müddət klubsuz qaldıqdan sonra Minsk "Dinamo"suna (əvəzedici komandaya) keçdim. 

– İlk 2 turda özünüzü yaxşı tərəfdən göstərmisiniz. Gələcəkdə daha iddialı komandalardan təklif olacağını gözləyirsiniz?
– Bilirsiniz, insan plan qurur, qərarı Allah verir. Əgər gələcəkdə hansısa təklif olarsa, müzakirə etməyə gələr.