"Qarabağ"ın prezidenti Tahir Gözəl evdə Şimali Makedoniya "Şkendiya"sına 5:1 hesabı ilə qalib gəldikləri UEFA Çempionlar Liqasının III təsnifat mərhələsinin cavab görüşündən sonra brifinq keçirib.

Prosport.Az xəbər verir ki, klub rəhbəri jurnalistlərin suallarını cavablandırıb.

– "Qarabağ" tarixində 4-cü dəfə Çempionlar Liqasının pley-off mərhələsinə vəsiqə qazandı. Belə böyük hesablı qələbə gözləyirdiniz?
– Rəqib komanda bizə qarşı Skopyedə çox gözəl oynamış, bizə çətin anlar yaşatmışdı. Səfərdə qələbə qazanmağımızda müdafiə xəttimiz çox önəmli rol oynamışdı. Bu gün isə məni ən çox sevindirən o oldu ki, yeni oyunçularımızın hamısını iş başında gördük. Onların arasında Azərbaycan futbolunun gələcək ulduzlarından Hikmət Cəbrayılzadəni də gördükdə xeyli məmnun oldum. Əlbəttə, bunu gözləmirdim. Hesab edirəm ki, bu gün Vətəndə, öz azarkeşlərimiz qarşısında oynamağın fərqini də göstərdik. Futbolçularımız meydana fərqli ab-havada çıxmışdılar. Məncə, bundan Azərbaycan qazandı. Biz də belə bir dəstək sayəsində xalqımıza qələbə sevinci bəxş etdik.

– Rəqib sanki ilk qolu vurmaqla, arı yuvasına çomaq soxmuş kimi oldu, "Qarabağ"ın əsəbi ilə oynadı...
– Bəli, eynilə elə oldu. Ən önəmlisi odur ki, buraxdığımız qoldan sonra azarkeşlərin "Qarabağ"a dəstəklərini eşitdinizmi? Böyük dəstək verərək, komandamızı ruhlandırdılar. Beləliklə, gözəl bir nəticə ilə istəyimizə çatdıq.

– Çempionlar Liqasının pley-off mərhələsində hansı rəqibi görmək istərdiniz?
– Məncə, Macarıstan "Ferensvaroş"u ciddi rəqibdir, dövlətdən və nüfuzlu insanlardan xüsusi dəstək görür, çox özəl yeri var, büdcə və imkanları genişdir. Amma biz də etdiyimiz gözəl transferlər və ən böyük dəyərlərimizdən olan sabit çıxışımızla seçilirik. Ötən illərdə qazandığımız və itirdiyimiz bizə təcrübə kimi miras qalıb. Baş məşqçimiz, heyətimiz, futbolçularımız eynidir. Bu "Qarabağ" Çempionlar Liqasının qrup mərhələsinə vəsiqə qazandığımız 2017/2018 mövsümündəki komanda deyil. Avropada çox böyük təcrübəyə malik komandamız var. İnanıram ki, rəqib qarşısına belə bir üstün keyfiyyətlərə malik komanda çıxacaq. Əsas mərhələyə tarixdə heç vaxt indiki qədər yaxınlaşmamışıq. Komandamızın bunun fərqində olduğunu və arzularımıza çatacağımızı güman edirəm. İnşallah, "Liverpul"u, PSJ-ni Bakıda qəbul edəcəyik və futbol bayramı yaşayacağıq.

– Hücumçu transferində nə yenilik var?
– Azarkeşlərə bunu deyə bilərəm ki, "Qarabağ"ın tarixindəki ən böyük büdcəni biz Qurban Qurbanova vermişik. Ancaq Qurban hocanın səbirli, təmkinli yanaşmasına biz çox ehtiramla yanaşırıq. Çünki orada səhv edə bilmərik. "Bayern" kimi klubların ən böyük uğuru odur ki, transferlərdə tələsmir, ehtiyatlı seçim edirlər. Biz də tələsməyəcəyik, bizə uyğun futbolçu olsa, dərhal alacağıq.

– "Qarabağ"da elə sistem qurulub ki, hücumçusuz belə, istənilən futbolçu ilə fərqlənə bilir...
– Tam razıyam. Çünki müdafiə və orta xətt işləyir. Yaxşı hücumçu alsaq, hesab edirəm ki, Avropa nəhəngləri ilə mübarizə aparmağa gücümüz çatacaq.

– Portuqaliya mətbuatı Andre Klovisin "Qarabağ"la razılaşdığı və Bakıya gələcəyi yazılıb. Bu barədə nə deyə bilərsiniz?
– Bu barədə məlumatım yoxdur.

– Hikmət Cəbrayılzadənin avrokubokda debütü sizi nə dərəcədə qane etdi?
– Biz buna ilk addım kimi baxırıq. Hikmətin fiziki durumu, intizamı, əxlaqı və istedadı bizi qane edir. Mən və məşqçilər onda böyük istedad görürük. Bəlkə də Azərbaycanda 10-15 ildə doğulan nadir talantlardan biridir. Amma bu istedad özünü gələcəkdə göstərəcəkmi, bunu zaman və Hikmət bizə göstərəcək. Hikmətdə "Qarabağ"a lazım olan bütün cəhətlər var.

– Deyə bilərikmi, 2-ci Nəriman Axundzadə və ya ondan daha yaxşısı yetişir?
– Güman edirəm ki, o tarixə düşə biləcək oyunçu ola bilər.

– Hikmətlərin yetişməsinə görə "Qarabağ" Akademiyasının iş fəaliyyətini qənaətbəxş hesab etmək olar?
– Mən Akademiyaya investisiyalarımızdan hələ də razı deyiləm. Hikmətlər çıxır, ancaq bu o demək deyil ki, biz rəhbərlik olaraq yaxşı iş görmüşük. Aftandil Hacıyev və məşqçilər heyəti əla işləyir. Ancaq klub rəhbəri olaraq biz onlara istədiyi şəraiti yarada bilməmişik. Hələ də Akademiya üçün yer tapa bilməmişik.