3x3 basketbolu üzrə millimiz və "Neftçi"nin FIBA Dünya Qadın Seriyası turnirində növbəti mərhələ yarışında iştirakı rəsmiləşib.

Prosport.Az xəbər verir ki, Kanadanın Edmonton (29-30 iyul) və Çinin İçan (4-5 avqust) şəhərlərində keçiriləcək yarışları buraxacaq hər iki komandamız Çexiyanın paytaxtı Praqada baş tutacaq mərhələ turnirində mübarizə aparacaq.

Həmin yarış da 4-5 avqustda keçiriləcək. Orada 14 komanda yarışacaq. Komandalarımızın potensial rəqibləri Kanada, Fransa, İspaniya, Litva, "Düsseldorf ZOOS" (Almaniya), İtaliya, "Dyör" (Macarıstan), Çexiya, İsrail, Çili, İsveçrə və Latviya olacaq.

Qeyd edək ki, bunadək hər iki komandamız 14-15 iyulda Kosovonun paytaxtı Priştinada keçiriləcək mərhələ yarışında mübarizə aparacaq. "Neftçi" həmçinin 19-20 iyulda Fransanın Bordo şəhərində keçiriləcək yarışda da iştirak edəcək.

Xatırladaq ki, "Neftçi" artıq Şuşa (Azərbaycan) və Netanya (İsrail) mərhələlərinin qalibi olub.