"Qarabağ" futbol klubunun prezidenti Tahir Gözəl UEFA Çempionlar Liqasının "Şelburn"la (İrlandiya) 1:0 başa çatan matçından sonra jurnalistlərin suallarını cavablandırıb.
Prosport.Az-ın əməkdaşının da suallar verdiyi həmin müsahibəni təqdim edirik:
– 2 oyunun nəticəsinə görə, "Qarabağ" mərhələ adladı. Komanda sizə necə təsir bağışladı?
– Komandamızın çıxışını çox müsbət qiymətləndirirəm. Gözəl oyun oldu. Əsas məsələ odur ki, zədə problemi ilə üzləşmədik. Səfər matçından gözəl nəticə ilə qayıtmışdıq. Burada da tərtəmiz qələbə qazandıq. Baxmayaraq ki, penaltini qaçırdıq, keçmiş olsun. Klub prezidenti kimi yeni futbolçuların durumundan razı qaldım. Düzdür, Dani Bolt zədələndiyi üçün bu matçda görə bilmədik. Amma hesab edirəm ki, çox gözəl transferlər edilib. Qurban Qurbanov bu işlə məşğuldur, daha 2 transfer istəyib, biz də dəstək veririk. Onun seçim aparmasını, bəyənməsini səbirsizliklə gözləyirik. Hədəfimiz odur ki, Çempionlar Liqasında əsas mərhələyə çıxaq.
– 2 transferdən biri hücum xəttinədir. Bəs digəri?
– Digəri hücumameyilli mərkəz oyunçusu olmalıdır.
– "Turan Tovuz"un sabiq hücumçunuz İbrahima Vadji ilə anlaşdığı yazılıb. Sizin seneqallı forvardla təmasınız olmuşdu?
– Bu danışıq detalında mən yoxam (gülür). Əsas mənim üçün transfer edilən 4 yeni oyunçudur. Mən Qurban Qurbanovu yeni transferlərə görə təbrik etmək istəyirəm. Doğrudan da "Qarabağ"ın bir dəst-xətti, oyun tərzi var. Yeni transferlər də bu sistemə uyğundur. Mən buna sevinirəm. Güman edirəm ki, hücumçu və hücumameylli yarımmüdafiəçi transferimiz də edilsə, mövsümə tam hazır olacağıq və Çempionlar Liqasının qrup mərhələsində oynadığımız 2017/2018 mövsümünü təkrarlayacağıq.
– Komanda artıq UEFA Konfrans Liqasında qrup mərhələsini təmin etdi...
– Əlbəttə. Amma hədəfimiz daha yuxarıdır. Bu, "Qarabağ"ın gəliri üçün də çox önəmlidir. Maliyyə vəziyyətimiz keyfiyyətli oyunçular gətirməyə də imkan verəcək. "Azərsun" əla sponsordur. İllərdir ki, bizi dəstəkləyirlər. "Qarabağ" klubu da çalışır ki, müstəqil olsun, sponsordan asılı olmasın. Müstəqillik hər kəsə xoşdur. Klub olaraq, biz də istəyirik ki, özümüzü öz gəlirlərimizlə idarə edək.
– "Styaua"nın sahibi Cici Bekali "Qarabağ" haqda qıcıq doğuracaq fikir səsləndirmişdi. Sizin həmkarınız sayılır. Ona cavab vermək fikriniz var?
– Mən də Qurban hocanın sözlərinə qoşuluram. Sözümüz varsa, onu meydanda deyəcəyik. Bunu əməllə göstərəcəyik. Bizə yaraşmaz. Fərqli insanlarıq. Bizim mənəviyyatımız başqadır. Dünyanı başqa cür görürük.
– Şimali Makedoniyaya, yoxsa Rumıniyaya getmək istərdiniz (bu sual veriləndə FKSB – "Şkendiya" görüşü başa çatmamışdı)?
– Bizə fərqi yoxdur. Hər ikisinə də hazırıq. Ötən mövsümkü revanş baxımından FKSB-ni istərdim. Ancaq komandamı yerində izləmək üçün Şimali Makedoniya klubu ilə düşməyimiz yaxşı olardı. Çünki bazar ertəsi Şimali Makedoniyada önəmli iş görüşməm var. Ancaq Rumıniya klubu ilə düşsək də, mənəvi cəhətdən onlarla qarşılaşmaqdan zövq alacağam.
Səbuhi Musa