"Avropa Cüdo Ümidləri" beynəlxalq turnirində iştirak edən cüdoçuların bir çoxunu gələcəkdə millilərimizdə görə biləcəyik".

Prosport.Az xəbər verir ki, bunu Bakıda keçirilən “Avropa Cüdo Ümidləri” beynəlxalq turniri çərçivəsində Azərbaycan Cüdo Federasiyasının (ACF) prezidentinin müşaviri Natiq Bağırov deyib.

O, beynəlxalq turnirin yeniyetmə cüdoçuların inkişafında əhəmiyyətli rol oynayacağını bildirib: "Bu turnirdə 12 ölkədən 500-ə yaxın oğlan və qız cüdoçular yarışır. Burada Azərbaycanın gələcək cüdoçuları güləşir. Gələcəkdə bizi mötəbər yarışlarda təmsil edəcəklər. Ümidvarıq ki, bu turnirdə iştirak edəcək cüdoçuların bir çoxunu gələcəkdə millilərimizdə görəcəyik.

Bu ildən Avropa Cüdo İttifaqı 13 (U-13) və 15 (U-15) yaşadək cüdoçular arasında bu turniri təşkil etməyi qərara alıb. Əminik ki, bu turnir ölkəmizdə növbəti illərdə də keçiriləcək. İnanıram ki, hər il onlarla ölkə təmsilçiləri gəlib bu yarışda iştirak edəcək".

Azərbaycan Cüdo Federasiyasının baş katibinin müavini və idman direktoru Kamran Talıbov isə Abşeron Olimpiya İdman Kompleksində təşkil olunan turnirlə yanaşı, seminarların da təşkil olunacağını bildirib: “U-13 və U-15 uşaqlar üçün seminarlar keçiriləcək. Turnirin əsas məqsədi seminarların təşkil edilməsidir. Burada Yaponiya, Serbiya və Azərbaycandan olan mütəxəssislər iştirak edir. Seminarda gənc cüdoçulara fiziki və texniki bacarıqlar öyrədilir. Bu yarış uşaqlar üçün bir növ festival xarakteri daşıyır".

Qeyd edək ki, beynəlxalq yarışda 12 ölkəni təmsil edən 88 klubun 436 idmançısı (364 oğlan, 72 qız) mübarizə aparır. U-13 və U-15 yaş kateqoriyalarında keçirilən turnirdə 33 çəki dərəcəsində qaliblər və mükafatçılar müəyyənləşəcək.