Abşeron Olimpiya İdman Kompleksində Avropa Cüdo Birliyinin təşkilatçılığı ilə Bakı Avropa Cüdo Ümidləri Turniri (Baku European Judo Hopes Tournament) və Kodokan mütəxəssislərinin texniki sessiyaları start götürüb.

Prosport.Az xəbər verir ki, beynəlxalq yarışda 12 ölkəni təmsil edən 88 klubun 436 idmançısı (364 oğlan, 72 qız) mübarizə aparır.

Azərbaycan bu yarışda 389 idmançı (320 oğlan, 69 qız) ilə təmsil olunur. Abşerona həmçinin, Xorvatiya, Almaniya, Yunanıstan, İsrail, Polşa, Rumıniya, Səudiyyə Ərəbistanı, Serbiya, Slovakiya, Tacikistan və BƏƏ cüdoçuları gəlib. 

U-13 və U-15 yaş kateqoriyalarında keçirilən turnirdə 33 çəki dərəcəsində qaliblər və mükafatçılar müəyyənləşəcək. Ölkəmizdə ilk dəfə keçirilən bu yarış sabah başa çatacaq.

Texniki sessiyalara isə Avropa çempionu, dünya çempionatının gümüş medalçısı serbiyalı Aleksandar Kukol və yaponiyalı Kodokan mütəxəssisi, dünya çempionatının mükafatçısı Tokuno Kazuhiko rəhbərlik edir. Zəngin təcrübəyə malik təlimçilər turnir iştirakçılarına unikal bilik və bacarıqlar təqdim edərək onların inkişafına töhfə verir.