Şimali Makedoniyanın paytaxtı Skopyedə XVIII Avropa Yay Gənclər Olimpiya Festivalının (EYOF) açılış mərasimi baş tutub.

Prosport.Az xəbər verir ki, açılış mərasimində Azərbaycan idmançıları paraddan 4-cü keçib.

Ölkəmizin üçrəngli bayrağını cüdo üzrə yeniyetmələr arasında Avropa çempionu Zeyd Ələsgərov və taekvondo üzrə ikiqat Türkiyə açıq birinciliyinin qalibi Humay Dadaşova daşıyıblar.

Festival iyulun 20-26-da Şimali Makedoniyanın Skopye və Kumanovo, eləcə də Xorvatiyanın Osiyek şəhərində keçiriləcək. Yarışlarda Avropanın 50 ölkəsindən 4 mindən çox idmançı 15 idman növü üzrə mübarizə aparacaq.