Azərbaycanın XVIII Avropa Gənclər Yay Olimpiya Festivalındakı (EYOF) bayraqdarları müəyyənləşib.

Prosport.Az xəbər verir ki, bu gün Şimali Makedoniyanın paytaxtı Skopyedəki Yan Sandanski İdman Mərkəzində keçiriləcək mərasimdə üçrəngli bayrağımızı cüdoçu Zeyd Ələsgərov (60 kq) və taekvondoçu Humay Dadaşova (49 kq) daşıyacaq.

Zeyd Ələsgərov cüdo üzrə yeniyetmələr arasında Avropa çempionatının və 3 dəfə Avropa Kubokunun qalibi, Humay Dadaşova isə taekvondo üzrə 2 dəfə Türkiyə açıq birinciliyinin qalibidir.

Qeyd edək ki, iyulun 20-dən 26-dək təşkil olunacaq budəfəki festival əvvəlkilərdən fərqli olaraq 2 ölkədə – Şimali Makedoniyanın paytaxtı Skopye və Kumanovo şəhərlərində, həmçinin Xorvatiyanın Osiyek şəhərində keçiriləcək.

Festivalda Azərbaycan komandası ümumilikdə 10 idman növündə 52 (28 oğlan, 24 qız) idmançı ilə təmsil olunacaq.