AFFA U-17 Liqasının bombardiri, "Qarabağ"ın 17 yaşadək komandasının hücumçusu Əli İbrahimin Prosport.Az saytına müsahibəsi

– U-17 Liqasında ötən mövsüm ən yaxşı bombardir oldunuz. Əvvəlcə bundan başlayaq...
– Bəli, 61 qol vurdum. 2-ci yerdəki rəqibimdən 20 top çox qola imza atdım. Məqsədim əvvəlki mövsümün bombardirindən çox qol vurmaq idi. Onda 56 olmuşdu, mən bunu 61-ə çatdırdım. Çox xoşbəxtəm ki, bombardir oldum. Ötən mövsüm qol sıralamasında 2-ci yeri tutmuşdum. Kaş ki, çempion da ola biləydik. Bu bombardirlikdə özümdən başqa, uşaqların ötürmələrinin də çox böyük rolu oldu. İnanıram ki, uşaqların hamısı da mənim bombardir olmağımdan xoşbəxtdir. 

– Çempionluğu 1 xalla "Neftçi"yə uduzdunuz. Bu haqda nə deyə bilərsiniz?
– Ardıcıl 2 ildir ki, çempionluğu qaçırırıq. Amma əsas çempionluq yox, böyük futbolçu olmaqdır.

– İsveçdəki turnirlə bağlı hansı təəssüratlarla Bakıya qayıdırsınız?
– Belə bir turnirin olduğunu hələ uşaqlıqdan bilirdim. Burada iştirak etmək maraqlı gəlirdi. İlk 2 oyunumuzu yaxşı keçirdik. 1-ci matçda qalib gəldik. Təəssüf ki, son 2 matçda uduzduq. Ardıcıl matçlar keçirməyimiz yorğunçuluğa səbəb oldu. Son matçda isə əsas 2 oyunçumuzun olmaması səbəbindən uduzduq.

– Qrupdan çıxmaq üçün həlledici matçda "Yötebori"yə uduzmağımıza görə meydançanın daha sərt olmasından da şikayətləndiniz...
– Nigeriyanın "Sportinq" komandası ilə matç bizi çox yordu. Dincəlmək üçün vaxtımız da az oldu. Qrupda sonuncu rəqibimiz öz azarkeşləri önündə oynayırdı və bu meydançada daha əvvəl 2 matç keçirmişdi. Ona görə də bu meydançaya öyrəşmişdilər. Meydança isə çox bərk idi.

– Çempionatda qolları sıralasanız da, burada fərqlənə bilmədiniz. Niyə alınmadı? Bunun səbəbini nədə görürsünüz?
– Burada rəqiblər çətindir. Onlara qol vurmaq üçün çempionatımızın səviyyəsinin qalxması lazımdır. Çempionatımızda eyni gücdə olan komandalar yarışsa, belə problemlə üzləşmərik.