"Qarabağ"ın 17 yaşadək komandasının (U-17) futbolçusu Əli Əliyev komandanın aparıcı üzvlərindən biridir. O, İsveçin Yötebori şəhərində keçirilən "Gothia Puma Trophy" turnirində komandanın hələ ki vurduğu qolların yeganə müəllifidir.

Prosport.Az-ın İsveçə ezam olunmuş əməkdaşı sağ cinah vingeri olan futbolçudan müsahibə götürüb.

– İsveçdəki turnir haqda təəssüratlarınız necədir?
– Turnir haqda onu deyə bilərəm ki, dünyanın ən yaxşı yarışlarından biridir. İstəyirdik ki, burada çempion olaq. Ancaq təəssüf ki, Estoniyadakı nəticəmizi təkrarlamaq qismət olmadı.

– Bu həm də ondan xəbər verirmi ki, burada rəqiblər daha səviyyəlidir?
– Bəli. Burada rəqiblər daha güclü, möhkəm və sərtdir. Çox yaxşı mübarizə aparırlar.

– "Qarabağ"ın turnirdə hələ ki qollarını siz vurmusunuz. İlk matçda İsveçin "Myelbi" komandası ilə oyunda vurduğunuz 2 qol komandaya qələbə qazandırdı. Bunlardan 1-ni cərimə zərbəsindən vurdunuz. Komandanın ştatlı cərimə zərbəsi vuran futbolçusu sizi adlandırmaq olar?
– Çox vaxt cərimə zərbələri mənə tapşırılır. Həmin matçda 10-cu dəqiqədə hesabda geriyə düşmüşdük. Sonra açılışdıq, öz oyunumuzu göstərdik və 2 qol vurduq. Bununla da komanda qalib gəldi.

– Ötən il bu turnirin çempionları olan Nigeriyanın "Sportinq" komandası ilə qolsuz heç-heçə oynadınız. Bu matç barədə nə deyə bilərsiniz?
– Keçən il çempion olsalar da, Nigeriya komandasına qarşı sonadək mübarizə apardıq və onlara uduzmadıq.

– Sizi niyə komandada "qoca" adlandırırlar?
– 8-9 ildir ki, mən bu komandada çıxış edirəm. Ona görə də məni digər Əli Əliyevdən fərqləndirmək üçün belə çağırırlar. Komandada 5 Əli və 2 Əli Əliyev ad-soyadlı futbolçu var.