Azərbaycanın yunan-Roma güləşçisi Həsrət Cəfərov (67 kq) bu il Azərbaycanın ev sahibliyi edəcəyi III MDB Oyunları ərəfəsində Bakı Şəhər Halqasının mətbuat xidmətinə müsahibə verib.
Prosport.Az xəbər verir ki, Paris-2024 Yay Olimpiya Oyunlarının bürünc medalçısı, üçqat Avropa və ikiqat dünya çempionu, 2021-ci ildə Rusiyanın Kazan şəhərində keçirilmiş ilk MDB Oyunlarının qalibi və bayraqdarı idman yolundan danışıb, gənc idmançılara tövsiyələrini verib.
- Həsrət, bu il III MDB Oyunları Azərbaycanda keçiriləcək. Bu tədbir, ölkəmiz və gənc idmançılar üçün nə qədər əhəmiyyətlidir?
- Bu, çox böyük bir hadisədir. III MDB Oyunları Azərbaycanın gənc istedadları üçün böyük fürsətdir. Məncə, bizim idmançılar bu şansı dəyərləndirməlidirlər. Onlara böyük bir şərəf nəsib olub – ölkəmizi nüfuzlu beynəlxalq turnirdə, özü də doğma vətəndə təmsil edəcəklər.
- Güləşçilərimizdən nə gözləyirsiniz?
- Gənclərimiz güclüdür. Onların məşqlərini izləyirəm və inanıram ki, yaxşı nəticələr göstərəcəklər. Azarkeşlərin dəstəyi böyük motivasiyadır.
- Bu, eyni zamanda, əlavə təzyiqə səbəb ola bilərmi?
- Mənim üçün bu, heç vaxt təzyiq olmayıb. Əksinə, tribunaların dəstəyi mənə hər zaman güc verib.
- Gənc idmançılara Oyunlardan öncə nə tövsiyə edərdiniz?
- Oyunlara maksimum məsuliyyətlə yanaşsınlar. Hər bir yarış – böyük məsuliyyətdir. Biz Azərbaycanı təmsil edirik və Oyunlara çox az vaxt qalıb. Hazır olmaq lazımdır – həm fiziki, həm də mənəvi cəhətdən. III MDB Oyunlarında iştirak edəcək bütün azərbaycanlı idmançılara uğurlar arzulayıram. Bu, ölkəmiz üçün çox önəmli bir hadisədir. Əminəm ki, Oyunlar ən yüksək səviyyədə keçiriləcək.
- I MDB Oyunlarını necə xatırlayırsınız?
- Mən çempion oldum və açılış mərasimində bayraqdar idim. Bu, həm böyük məsuliyyət, həm də şərəf idi. İstəyirdim ki, mərasimə qızıl medalla çıxım və bu, mümkün oldu. Çünki güləş yarışlarının ilk günü açılış mərasimdən öncə idi. Açılışda çempion kimi bayrağı daşımaq istəyirdim. Rəqabət çox yüksək idi, amma öhdəsindən gəldim.
- Bu 5 ildə Həsrət Cəfərov necə dəyişdi?
- Çox medal qazandım, Parisdə Olimpiya bürüncünü aldım, 3 dəfə Avropa çempionu oldum. Amma ən əsası – insan olaraq dəyişmədim. Ən böyük uğurum olimpiya medalı olsa da, dayanmıram.
- Növbəti hədəfiniz nədir?
- Dünya çempionu olmaq istəyirəm. Sonra isə arzum Los-Anceles-2028 Olimpiadasında qızıl medal qazanmaqdır.
- Sizi idmanda nə motivasiya edir?
- Nəticələr və güləşə olan sevgim. Bu, sadəcə bir iş deyil – bu, mənim həyat tərzimdir. Milyonlar sənin uğurlarını izləyirsə, dayanmağa haqqın yoxdur.
- Yeni başlayan güləşçilərə nə deyərdiniz?
- İlk uğurlardan sonra arxayınlaşmaq olmaz. İdman – daim əziyyət, zəhmət tələb edir. Öz üzərində işləmirsənsə - nəticə də olmayacaq. Xüsusilə böyüklər kateqoriyasına keçiddə bu daha da çətindir. Daim üzərində işləyin.