Premyer Liqaya qayıdan "Karvan"da baş məşqçi postu üçün adı çəkilən Azər Məmmədov bu komandada çalışmayacaq.

Prosport.Az bunun səbəbini öyrənmək üçün Gəncə futbol məktəbinin yetirməsi olan məşqçidən müsahibə götürüb.

– Yeni təklifiniz var?
– Bilirsiniz ki, "Karvan" variantı vardı. O məsələ də artıq bağlanıb.

– Elə müsahibənin məğzi onunla bağlıdır. Niyə alınmadı?
– Elə bir problemli şey baş verməyib. Mənim onlardan heç bir narazılığım yoxdur.

– Kim tərəfindən sizə təklif gəlmişdi?
– Kənan Kərimov tərəfindən. Görüşüb söhbət etdik. Düşünmək üçün vaxt istədim. Vaxtı çatanda da getmək istəmədim.

– Mətbuatda yazılana əsasən, siz "saxta baş məşqçi" obrazında olmaq istəmədiyinizə görə, bu keçid baş tutmayıb. Adınız baş məşqçi olsa da, "Karvan"da köməkçi kimi işləmək istəməməyiniz bu sövdələşmənin alınmamasında rol oynayıb?
– Kənanla münasibətim yaxşıdır. Mənə təklif olunubsa, onlara təşəkkürdən başqa heç nə deyə bilmərəm. Sadəcə, oturub fikirləşdim və özüm qərar verdim ki, hələ tələsməyim. Mən "Kəpəz"də baş məşqçiliyə başlayanda, 3 aydan sonra orada yer boşaldı (gülür). Onsuz da Premyer Liqada məşqçiləri tez-tez çıxarırlar. Ona görə də işləmək variantı həmişə ola bilər. Bu səbəbdən "Karvan"ın təklifinə tələsik müsbət cavab vermək istəmədim.

– Qərarınızdan sonra Kənan Kərimov sizdən incimədi?
– Yox, əvvəlki münasibətimizi saxlamışıq. Ondan möhlət istəmişdim. Möhlət vaxtı çatanda onunla açıq danışdım. Dedim ki, özünə başqa variant fikirləşsin. Sizə dediklərimi ona da dedim. Gözləmə mövqeyində qalmağa üstünlük verdiyimi söylədim. Azər Məmmədov olmadı, adaşım Azər Həşimov gətirildi (gülür). Həşimov da yaxşı oğlandır, xətrini istəyirəm.

Səbuhi Musa