Premyer Liqaya qayıdışını rəsmiləşdirən "Karvan"da məşqçilər korpusunda qeyri-müəyyənlik davam edir. I Liqada komandanın baş məşqçisi olmuş Kənan Kərimovun Yevlax klubuna vitse-prezident təyin olunması da çalışdırıcı sahəsində dəyişiklik olacağına işarədir.

Prosport.Az hazırda komandanı məşqlərə çıxaran Kənan Kərimovdan müsahibə götürüb.

– Komandanın hazırlıqları necə gedir?
– İyunun 26-dan Yevlaxda komanda olaraq toplanmışıq. Bu gün ilk mərhələnin sonuncu günü idi. Əsasən seleksiyaya gələn həm legioner, həm də azərbaycanlı futbolçulara baxırdıq.

– Seçdiyiniz futbolçular oldu?
– 3-4 futbolçu var ki, onlara bir daha şans verəcəyik.

– 2-ci toplanış nə vaxta planlaşdırılıb?
– İyulun 4-dən başlayacaq. Yenə Yevlaxda hazırlıq keçəcəyik.

– Yoxlama oyunları keçirəcəksinizsə, hansı komandalarla qarşılaşacaqsınız?
– 3 yoxlama matçı keçirəcəyik. "Kəpəz", "Şamaxı" və "İmişli" ilə oynayacağıq. İyulun 16-da "Kəpəz"lə matç Mingəçevirdə olacaq. Ayın 21-də "Şamaxı" ilə Qəbələdə oynayacağıq. İyulun 30-da isə "Şamaxı" ilə Ağsuda qarşılaşacağıq.

– Bəzi futbolçuları yola saldınız. Bunların içərisində bombardiriniz Bəhruz Teymurovu yola salmağınız gözlənilməz oldu...
– Bəhruza müqavilə təklif olundu. Maliyyə şərtlərinə görə qəbul etmədi və komandanı tərk etdi.

– Mətbuatda adı çəkilən yeni legionerlərlə nə vaxt müqavilə bağlanılacaq?
– Ayın 5-6-dək bu məsələ rəsmiləşəcək.

– Bizdə olan məlumata görə, iyunun 24-də keçirilən Klublar Komitəsinin iclasında iştirak etmisiniz. Siz vitse-prezident təyin olunmusunuz?
– Bəli, orada iştirak etmişəm. Vitse-prezident təyin olunmuşam.

– Klubda hazırda 1 vitse-prezident var?
– Bəli.

– Məşqçilər korpusunda dəyişiklik olacaqmı?
– Çox güman ki, olacaq. Yerli məşqçi təyinatı gerçəkləşəcək.

– Vitse-prezident təyinatından sonra belə başa düşmək olur ki, siz məşqçilər korpusunda yeni baş məşqçi gələnədək işləyəcəksiniz...
– Buna hələ tam aydınlıq gətirmək istəmirəm. Bu məsələ gələcək işlərdən asılıdır.

Səbuhi Musa