Şimali Makedoniyanın paytaxtı Skopyedə keçirilən cüdo üzrə yeniyetmələr arasında Avropa çempionatı başa çatıb.

Prosport.Az xəbər verir ki, Azərbaycan milli komandası fərdi yarışları 3 qızıl, 1 gümüş və 2 bürünc olmaqla ümumilikdə 6 medalla tamamlayıb.

Yığmamızın heyətində Anar Quliyev (50 kq), Rəsul Əlizadə (55 kq), Zeyd Ələsgərov (60 kq) qızıl, Nərmin Ağamirzəzadə (48 kq) gümüş, Gülşən Hüseynova (44 kq) və Leyla Ələkbərova (48 kq) bürünc medal əldə edib.

Bu nəticə ilə millimiz medalların əyarına görə ümumi komanda hesabında 2-ci, oğlanlar arasında isə 1-ci yeri tutub. 2-ci yerə görə təqdim olunan mükafatı yeniyetmə oğlanlardan ibarət yığmamızın məşqçisi Nicat Şıxəlizadə qəbul edib.

Qarışıq komanda yarışlarında isə millimiz Çexiyaya 4:1 qalib gəlsə də, 1/4 finalda Belarusa 3:4 uduzub. Komandamız bürünc medal üçün təsəlliverici yarışa qatılsa da, burada Bolqarıstana məğlub olub – 1:4.