Azərbaycan Üzgüçülük Federasiyasının (AÜF) yeni loqosu, vebsaytı, sosial şəbəkə səhifələri və idmançı formaları təqdim olunub.
Prosport.Az xəbər verir ki, yeni loqo, brendbuk, vebsayt, rəqəmsal platforma akkauntları və milli komanda formaları ilə Federasiyanın imici müasir beynəlxalq standartlara daha da uyğunlaşıb.
AÜF-nin yenilənmiş loqotipi irəliləyişi, çevikliyi və dözümlüyü simvolizə edən formatda hazırlanıb. Minimalistik və dinamik dizayn tərzi ilə hazırlanmış loqo Federasiyanın yanaşmasını əks etdirmək və beynəlxalq səviyyədə tanınmasını artırmaq məqsədi daşıyır.
Milli komandalar üçün hazırlanmış yeni formalar isə həm də funksionallığı ön planda saxlayır. İtaliyanın məşhur “Macron” şirkətilə tərəfdaşlıq çərçivəsində təqdim edilmiş dəst, AÜF-nin yeni imicinin vacib parçasıdır. Əlavə olaraq üzgüçülük üzrə milli komandanın üzvlərinə sahəsinin lideri olan Böyük Britaniyanın “Speedo” şirkətinə məxsus idman geyimləri təqdim edilib.
Bununla yanaşı, AÜF rəqəmsal aləmdə də daha geniş şəkildə təmsil olunacaq. Artıq federasiyanın fəaliyyəti ilə bağlı məlumatlar yalnız “Facebook” və “Instagram”da deyil, həmçinin “LinkedIn”, “TikTok”, “X” və “YouTube” kimi platformalarda da paylaşılacaq. Bu, qurumun daha böyük auditoriya üçün əlçatan olmasını, o cümlədən Federasiyanın nəzdində olan idman növlərinin ölkədə daha da populyarlaşmasını hədəfləyir.
Federasiyanın rəsmi www.asf.az vebsaytı da tamamilə yenilənib. İstifadəçiyə rahat interfeys və mobil cihazlara uyğun olmasıyla sayt ziyarətçilərinə AÜF-ə aid rəsmi xəbərlər və multimedia materialları ilə sosial şəbəkələrdəkindən daha geniş və ətraflı şəkildə tanışlıq üçün imkanlar yaradacaq. Habelə yerli və beynəlxalq yarışlar haqqında məlumatların, eləcə də ölkədəki bütün hovuzların xəritəsinin yerləşdirilməsi nəzərdə tutulub.
Qeyd edək ki, cari ilin yanvar ayında keçirilmiş ümumi yığıncaqda Zaur Əliyev ASF-nin prezidenti seçilib. Ötən aylar ərzində strategiya və struktur baxımından yenilənmə prosesinə, beynəlxalq əlaqələrin genişləndirilməsinə start verilib. İlin sonuna qədər bir sıra digər yeniliklərin və layihələrin də həyata keçirilməsi planlaşdırılır. Məqsəd su idman növlərinin Azərbaycanda kütləviləşdirilməsi və peşəkar idmançıların hazırlıq səviyyəsinin artırılmasından ibarətdir.
