Macarıstanın paytaxtı Budapeştdə keçirilən dünya çempionatının fərdi yarışında Azərbaycanın daha bir cüdoçusu bürünc medal qazanıb.

Prosport.Az xəbər verir ki, Avropa çempionumuz Elcan Hacıyev (90 kq) Nurbek Murtozoyevə (Özbəkistan) vaza-ari ilə, Çenq Pen-yuya (Tayvan) və Adam Kopetskiyə (Çexiya) qalib gəlib.

O, yarımfinalda ötən ilin dünya çempionu Qoki Tacimaya (Yaponiya) ipponla uduzub. 23 yaşlı idmançımız 3-cü yer uğrunda görüşdə estoniyalı Klen-Kristofer Kalyulaidə yuko xalı ilə qalib gəlib. Elcan Hacıyev karyerasında ilk dəfə dünya çempionatının medalını qazanıb.

Bununla da 2-ci bürünc medal yığmanın aktivinə yazılıb. Ötən gün Zelim Tçkayev (81 kq) fəxri kürsünün 3-cü pilləsinə qalxmışdı. Azərbaycan hazırda medal sıralamasında Almaniya və Monqolustanla birgə 12-ci sıradadır.

Bu gün tatami üzərinə çıxan Azərbaycanın digər cüdoçusu Vüqar Talıbov (90 kq) isə 1/32 finalda dünya və Avropa çempionu olmuş gürcüstanlı Luka Maysuradzeyə 1 vaza-ari və 2 yuko xalı ilə uduzaraq yarışı mükafatsız başa vurub.

10:09

Macarıstanın paytaxtı Budapeştdə keçirilən dünya çempionatının fərdi yarışında bu gün Azərbaycanın daha iki cüdoçusu mübarizəyə qoşulacaq.

Prosport.Az xəbər verir ki, Vüqar Talıbov və Elcan Hacıyev (hər ikisi 90 kq) tatami üzərinə çıxacaq.

V.Talıbov 1/32 finalda gürcüstanlı Luka Maysuradze ilə üz-üzə gələcək.

E.Hacıyev isə 1/16 finaldan mübarizəyə qoşulacaq. Onun rəqibi 1/32 finalda baş tutacaq Nurbek Murtuzoev (Özbəkistan) - Remi Feullet (Mavriki) görüşündə müəyyənləşəcək.

Qeyd edək ki, Azərbaycanı mundialda 10 çəki dərəcəsində 13 cüdoçu (9 kişi, 4 qadın) fərdi yarışlarda təmsil edir. Millimiz həmçinin qarışıq komanda yarışında mübarizə aparacaq. Cüdoçularımızdan Zelim Tçkayev bürünc medal qazanıb.