Millimizin sabiq qadın cüdoçusu Açelya Toprak yenidən Böyük Britaniyanın şərəfini qoruyacaq.

Prosport.Az-ın xəbərinə görə, milliyyətcə Kipr türkü olan 27 yaşlı idmançı Macarıstanın paytaxtı Budapeştdə keçirilən dünya çempionatında çıxış edəcək.

Toprak bu gün Bakı vaxtı ilə saat 13:00-da start götürəcək 57 kq-da vətəndaşı olduğu Böyük Britaniya adından yarışacaq. Onun 1/32 finalda ilk rəqibi Honkonq cüdoçusu Nok Lam Yeunq olacaq. Qalib gələcəyi halda, Almaniyanın Avropa çempionu Seyya Balhausla üz-üzə gələcək.

Bu çəki dərəcəsində Azərbaycanın cüdoçusu da yarışacaq. Fidan Əlizadə 1/16 finalda Serbiyanın Avropa mükafatçısı, U-23 və gənclər arasında Avropa çempionu Maritsa Perişiçlə qarşılaşacaq.

Qeyd edək ki, Açelya Toprak 4 avqust 2023-cü ilədək Böyük Britaniyanın, 6 noyabr 2023-cü ildən isə Azərbaycanın adından çıxış edib. Lakin çıxışı uğursuz olduğundan və bu çəkidə ötən il Fidan Əlizadə həm U-23-lərdə, həm də gənclərdə Avropa çempionu olduğundan, Topraka ehtiyac qalmayıb.