Macarıstanın paytaxtı Budapeştdə keçirilən cüdo üzrə dünya çempionatının 2-ci günündə Azərbaycan idmançıları medal qazana bilməyib.

Prosport.Az xəbər verir ki, Azərbaycan millisinin daha 2 idmançısı tatamiyə çıxıb. Hər iki cüdoçu çıxışını erkən başa vurub.

Dünya çempionatı
Kişilər
66 kq
Mübarizəyə 1/32 finaldan başlayan Ruslan Paşayev (66 kq) ilk qarşılaşmasında Ronald Limanı (Braziliya) məğlub edib. O, 2-ci görüşünü italiyalı Matteo Pirasa qarşı keçirib və bu dueldən də qalib ayrılıb. Paşayev 1/8 finalda Takeşi Takeoka (Yaponiya) ilə gücünü yoxlayıb. Rəqib qalib gəldiyindən, təmsilçimiz mundialla vidalaşıb.

Qadınlar
52 kq
Gültac Məmmədəliyeva 1/32 finalda Sofiya Asvestaya (Kipr) uduzub.

Qeyd edək ki, yarışa 13 cüdoçu ilə yollanan millimiz ilk günü medalsız başa vurub. Əhməd Yusifov (60 kq), Leyla Əliyeva və Könül Əliyeva (hər ikisi 48 kq) məğlubiyyətə üzülüb. Komandamız mundialda, həmçinin qarışıq komanda yarışında mübarizə aparacaq.

10:12

Bu gün Azərbaycanın daha 2 cüdoçusu Macarıstanın paytaxtı Budapeştdə böyüklər arasında keçirilən dünya çempionatında mübarizəyə qoşulacaq.

Prosport.Az xəbər verir ki, ikinci yarış günündə Gültac Məmmədəliyeva (52 kq) və Ruslan Paşayev (66 kq) tatami üzərinə çıxacaqlar.

Paşayev 1/32 finalda Ronald Limanın (Braziliya) müqavimətini qırmağa çalışacaq. Məmmədəliyeva isə eyni raundda Sofiya Asvesta (Kipr) ilə üz-üzə gələcək.

Ötən gün mübarizəyə start verən təmsilçilərimizdən Əhməd Yusifov (60 kq), Leyla Əliyeva və Könül Əliyeva (hər ikisi 48 kq) yarışı mükafatsız başa vurublar.

Qeyd edək ki, mundialda Azərbaycanı 10 çəki dərəcəsində 13 cüdoçu (9 kişi, 4 qadın) fərdi yarışlarda təmsil edəcək. Yığmamız həmçinin qarışıq komanda yarışında mübarizə aparacaq.