Cüdo üzrə Azərbaycan milli komandası Macarıstanın paytaxtı Budapeştdə keçirilən dünya çempionatında mübarizəyə başlayıb.

Prosport.Az xəbər verir ki, ilk yarış günündə 3 tatami ustası qüvvəsini sınayıb.

Qadınların mübarizəsində 48 kq çəki dərəcəsində yer alan cüdoçulardan Leyla Əliyeva 1/32 finalda türkmənistanlı Kurbanay Kurbanovaya qalib gəlsə də, növbəti görüşündə ispaniyalı Laura Martines Abelendaya uduzaraq, mübarizəni dayandırıb.

Könül Əliyeva isə 1/32 finala təsadüf edən ilk qarşılaşmasında ABŞ-dan olan Mariya Seliya Laborda yenilib və çempionatla erkən vidalaşıb.

Kişilərin yarışında Monteneqroda keçirilmiş son Avropa çempionatının bürünc medalçısı Əhməd Yusifov 60 kq çəkidəki 1/16 final görüşündə yaponiyalı ikiqat dünya və olimpiya mükafatçısı Ryuju Naqayama ilə görüşün əvvəllərində vaza-ari ilə önə çıxsa da, cərimə xalları ilə uduzaraq, mundiala əlvida deyib.

Qeyd edək ki, qarşıdakı günlərdə Azərbaycanın daha 10 cüdoçusu (8 kişi, 2 qadın) mübarizəyə qoşulacaq.

10:10

Bu gün Macarıstanın paytaxtı Budapeştdə cüdo üzrə böyüklər arasında dünya çempionatına start veriləcək.

Prosport.Az xəbər verir ki, ilk yarış günündə Azərbaycanın 3 cüdoçusu mübarizə aparacaq.

Əhməd Yusifov (60 kq) 1/16 finalda yaponiyalı Ryuju Naqayama ilə üz-üzə gələcək.

Leyla Əliyeva (48 kq) 1/32 finalda türkmənistanlı Kurbanay Kurbanova ilə qarşılaşacaq.

1/32 finaldan başlayacaq Könül Əliyeva (48 kq) isə ABŞ təmsilçisi Mariya Seliya Labordeni məğlub etməyə çalışacaq.

Qeyd edək ki, mundialda Azərbaycanı 10 çəki dərəcəsində 13 cüdoçu (9 kişi, 4 qadın) fərdi yarışlarda təmsil edəcək. Yığmamız həmçinin qarışıq komanda yarışında mübarizə aparacaq.