Milli Olimpiya Komitəsinin (MOK) İcraiyyə Komitəsinin (İK) iclası keçirilib.

Prosport.Az xəbər verir ki, MOK-un vitse-prezidenti Çingiz Hüseynzadə İcraiyyə Komitəsinin iştirakçılarını gündəliklə tanış edib.

Gündəliyə Bakı-2015 I Avropa Oyunlarının 10 illik yubileyinə həsr edilmiş “Süni intellekt (AI) və İdmanda innovasiya” müsabiqəsi, EYOF-2025 Avropa Gənclər Olimpiya Festivalı, Olimpiya Günü ilə bağlı və cari məsələlər daxil edilib.

Çingiz Hüseynzadə Bakı-2015 I Avropa Oyunlarının 10 illik yubileyindən danışıb. Onun sözlərinə görə, ilk dəfə “Süni intellekt (AI) və İdmanda innovasiya” müsabiqəsi dünyada ilk dəfə təşkil olunacaq. Müsabiqədə iştirak üçün yaşı 18-dən yuxarı olan hər bir şəxs müraciət edə bilər. Müsabiqənin münsiflər heyətinə İspaniya Milli Olimpiya Komitəsinin baş katibi Viktoriya Kabezas, Türkiyə Milli Olimpiya Komitəsinin İctimaiyyətlə əlaqələr üzrə direktoru Volkan Önər, I Avropa Oyunlarının ulduz səfiri Tünzalə Ağayeva, yunan-Roma güləşi üzrə qızıl mükafatçısı Rasul Çunayev və MOK-un nümayəndəsi Mehman Kərimov daxildir.

İyunun 23-də Olimpiya Günü ilə bağlı Milli Olimpiya Komitəsində tədbir təşkil olunacaq.

MOK-un Beynəlxalq proqramlar idarəsinin müdiri Mehman Kərimov Bakı-2015 Avropa Oyunlarının 10 illik yubileyinə həsr edilmiş “Süni İntellekt (AI) və İdmanda innovasiya müsabiqəsi”nin təqdimatı ilə bağlı çıxış edərək müsabiqənin keçirilmə şərtləri barədə ətraflı məlumat verib.

I Avropa Oyunlarının yunan-Roma güləşi üzrə qalibi Rəsul Çunayev və oyunların ulduz səfiri Tünzalə Ağayeva Bakı-2015 Avropa Oyunları barədə təəssüratlarını bölüşüblər.

İclasda, həmçinin Skopye-2025 EYOF-un missiya rəhbəri Vaqif Əliyev İcraiyyə Komitəsinin üzvlərinə yarışa hazırlıqla bağlı məlumat verib.