Minifutbol yığmamız 2022-ci ildə Slovakiyanın Koşitse şəhərində keçirilmiş Avropa çempionatının qalibi olarkən o, həmin heyətdə yox idi. Yalnız həmin yarışdan sonra yığmamıza qoşulan qapıçı böyük futbolda "İnter" və "Qarabağ"da, eləcə də MOİK, "Qaradağ Lökbatan", "Qusar" kimi klublarda çıxış edib. Hətta "Qarabağ"ın əsas heyətində ehtiyat qapıçı da olub. Söhbət dünya çempionu Ağaseyid Qasımovdan gedir.

28 yaşlı qolkiper Prosport.Az saytına müsahibəsində ölkə başçısı İlham Əliyevlə kiçik dialoqundan da danışıb.

– Ən çətin oyununuz kimə qarşı oldu?
– Düşünürəm ki, 1/8 finalda son dünya çempionu Rumıniya ilə oyunumuz ağır oldu. Amma onlardan başqa, digər komandalar da yaxşı formada idi. Məsələn, son Avropa çempionu Serbiya bizim üçün çətin rəqib sayılırdı. 1/4 finalda İngiltərə və yarımfinalda Monteneqro ilə oyunlarımız çətin keçdi. Azarkeşlərimizin dəstəyi ilə onlara qalib gələ bildik. Builki dünya çempionatı əvvəlki dünya və Avropa birincilikləri ilə müqayisədə daha gərgin və maraqlı keçdi. Komandalar Bakıya çox yaxşı hazırlaşıb gəlmişdilər. Amma möhtəşəm atmosferlə bütün komandalara qalib gəlməyi bacardıq.

– Yarımfinalda Monteneqroya 23-cü dəqiqədə qol vurdunuz. Bunun üzərində məşq keçirsiniz?
– Məşqdən əvvəl və sonra qapıya zərbələr üzərində də işləyirdim. "Zirə" ilə Azərbaycan çempionatında da belə qollar vururam. Qapıçının qol vurması onun üçün böyük üstünlükdür.

– Bəhreynlə qrup matçında topu irəliyə atmadınız və komanda yoldaşınız topu itirdi, nəticədə top buraxdıq. Rumıniya ilə matçda isə kobud səhvə yol verdiniz...
– İlk oyun həmişə ağır olur. Stadion amili də vardı. Örtük yeni idi. Oynamaqda çətinlik çəkirdik. Ötürmə düzgün getmirdi. Amma deməzdim ki, ilk oyunda futbolçumuz səhv etdi. Yanımızda oyunçu varsa, topu qabağa yox, ona ötürməliydim. Düzdür, mənə topu qaytara bilərdi. Sadəcə, rəqib oyunçunu yaxına buraxdığı üçün texniki səhv oldu. Rumıniya ilə matçda isə anlaşmamazlıq oldu. Komanda yoldaşımla bir-birimizi başa düşmədik. Ona görə də qol buraxdıq. Çox şükür ki, həmin matçda penaltilərdə qalib gəldik.

– Dünya çempionu olanda nə hiss keçirdiniz? Dünya çempionu olduğunuza inana bilmisiniz?
– İndi də inana bilmirik ki, biz dünya çempionu olmuşuq. Hissləri bölüşmək o qədər çətindir ki... Çox qürurverici hissdir.

– İlk dəfə ölkə başçısı ilə görüşdünüz. Bu görüşdən nə vaxt xəbər tutdunuz?
– Dünya çempionu olduğumuzun ertəsi səhəri bizə bu barədə deyildi.

– Prezident görüşərkən orada sizə nə deyir?
– Dedi ki, sən qapıçısan, qol da vurdun, qol vuran qapıçısan. Mən də təsdiqləyərək "bəli" cavabı verdim. Halbuki özümü təqdim etməmişdim...

– Deməli, vaxt tapıb diqqətlə oyunlarınıza baxırmış...
– Bəli. Özü də bildirdi ki, qrupdan sonrakı 4 oyunumuzu izləyib. Bizə dəyər verdiyi üçün ona minnətdarıq.

– O vaxt böyük futboldan ayrılmağınıza səbəb nə oldu?
– Potensial olaraq çox yaxşı idim. 14 yaşımda "Qarabağ"a keçmişdim. Amma məndə boy problemi olduğu üçün böyük futboldan uzaqlaşmalı oldum.

– Böyük futboldan təklif gələrsə, qayıda bilərsiniz?
– Böyük futbol bizə daha rahatdır. Çünki əvvəlcədən onu oynamışıq. Amma yəqin ki, minifutbolla davam edəcəyəm. Burada daha da uğurlar əldə etmək istəyirəm. Çempionlar Liqasında 3-cü olmuşuq, amma qalib ola bilməmişik. İnşallah, yeni avrokubok mövsümündə də bu uğura imza atarıq.

Səbuhi Musa