Yeni mövsüm, yeni baş məşqçi, yeni futbolçular, yeni ümidlər, ancaq köhnə hamam, köhnə tas... “Neftçi”nin son illərini bir cümlə ilə izah etmək istəsək, məncə ən idealı bu olar. Hər mövsümün başlanğıcında eyni şeyi görüb, hər mövsümün sonunda eyni kədəri yaşayan bir klub. Nə düzgün getmir?
Roman Qriqorçuk komandanın baş məşqçisi təyin olunanda media, azarkeşlər, hər kəs “aha, deyəsən irəliləyiş var” deyə düşündü. Hətta, bu “Neftçi”nin “Qarabağ”ın hegemonluğuna son qoyacağını iddia edənlər də vardı. Amma, gəl ki ölkəmizdə çox sevilən Roman bir qələbə belə qazana bilmədən “Neftçi” azarkeşlərin nifrəti ilə yola salındı. Nə etmədi ki, Roman. Ən əsası klubdaxili xaos yaratdı. Kapitanlığı Emin Mahmudovdan aldı, kapitan adına layiq olmayanlara verdi. Bu hərəkətlə illərini “Neftçi”yə vermiş Emini 10 addım geriyə saldı. Özü ilə gətirdiyi futbolçular isə... Bu cümləni tamamlamağa ehtiyac belə yoxdur. Qara Qarayev kimi futbolçunu “oyununa uyğun deyil” deyə oynatmadı, əvəzində aldığı futbolçuların səviyyəsi isə Qaranın yanından belə keçə bilmədi.
Rəhbərliyin dəyişməsi, idarəçilikdə türk modeli klubu görüntü baxımından “şən” göstərsə də, problemlər aşıb-daşırdı. Belə bir anda gözlər yeni baş məşqçiyə çevrildi. Klubu son dəfə çempion edən Samir Abasov yenidən “Sumqayıt”dan qoparıldı. Samir Abasov bir çox şeyi dəyişdi, ya da dəyişməyə cəhd etdi. Qələbələr qazandı, azarkeşlərə ümid verdi, amma lazım olanı bacarmaq üçün əlində olanlardan istifadə edə bilmədi. Çünki əlində olan futbolçular azarkeşlərin dili ilə desək, “istifadəyə yararsız” idi. Kubokda “Sabah”a məğlubiyyət isə “Neftçi”nin 1 ilini də medalsız başa vurmasına səbəb oldu. Beləcə daha bir uğursuz mövsüm “Neftçi” üçün başa çatdı.
Klubun əsas problemi müdafiə idi desəm, yəqin ki, hamı mənimlə razılaşar. Yuri Matias, Azər Salahlı, Höccət Haqverdi, Azər Əliyev və s. Bu mövqedəki hər kəs sanki rəqibdən oynadıqlarını göstərmək üçün əlindən gələni edirdi. Hətta özünü meydanda “lider” kimi göstərməyə, daha doğrusu azarkeşlərə özünü “lider” kimi sırımağa çalışan Yuri hər oyunda o qədər kobud səhvlər edirdi ki, bu hərəkətlər hətta, adamın bukmeyker kontorlarına çalışdığını iddia etmək üçün əsas verirdi. Nə isə... Yazdıqca yenə də əsəbiləşirəm...
Klub bu mövsüm ərzində 13 futbolçu transfer edib və bu fubolçuların faydalı iş əmsalı demək olar ki, 0-a bərabər olub. Təsəvvür edirsiniz??? 13 futbolçu transfer edəsən və onlardan 1-2-sini çıxmaq şərtilə heç bir fayda görə bilməyəsən... Bu da onu deməyə əsas verir ki, transfer siyasəti də həmin futbolçular kimi 0-a bərabər oldu.
Bir neçə gün əvvəl klubdan verilən məlumata görə, 7 futbolçu ilə yollar ayrıldı və bu siyahı yəqin ki, uzanacaq. Baş məşqçi Samir Abasov öz postunda qaldı, növbəti mövsüm üçün yeni hədəflər qoyuldu.
Klub bu mövsüm avrokuboklarda da iştirak etməyəcək. Bəlkə də elə ən xeyirlisi bu oldu. Hazırlaşmaq, yeni heyət qurmaq, ötən illərdəki səhvləri müzakirə edib, nəticə çıxarmaq daha asan olacaq. Əgər ki yazılanları doğru etsələr, “Neftçi” növbəti mövsümdə əvvəlki əzəmətini qaytara bilər. Bunu ən çox gözləyən və türklər demiş, “haqq edən” azarkeşlərdir. İllər boyu kədərə qərq olan “Neftçi” azarkeşləri.. Onların da gülməyə, sevinməyə, kubokla fotolar paylaşmağa haqqı var.
Səbuhi SADİQ
Prosport.az üçün