3 gün əvvəl İran cüdo millisinə baş məşqçi təyin olunan Rəşad Məmmədovun Prosport.Az saytına müsahibəsi
– İrandan necə oldu ki, təklif aldınız?
– İrandan başqa, Çindən də təklifim vardı. CV göndərmişdim, onlar bəyənmişdi. İran Cüdo Federasiyasının prezidenti Araş Mirismaili şəxsən mənə zəng vurdu ki, sizinlə görüşmək istəyirik. Mən də İrana getdim. Orada müqaviləni razılaşdırdıq. Çinlilərin təklifindən isə imtina etdim.
– Çin də sizə əsas millidə iş təklif edirdi?
– Onlar gənclər millisi üçün məni istəyirdi. Dedilər ki, bir az burada işlədikdən sonra əsas milliyə məni götürə bilərlər. Ona görə də onlarla razılaşmadım.
– Həm də yəqin Çinin Azərbaycandan uzaqlığı, qidalanma da qərarınıza təsir etmiş olar...
– Bəli. Həm bizdən uzaqda yerləşirlər, həm də qidalanma bizə uyğun deyil.
– Müqavilənizin müddəti neçə illikdir?
– 2028-ci il Los Anceles Olimpiadasının sonuna kimi.
– Ramiz Ramizzadənin də sizinlə birgə Tehrana dəvət olunduğunu bilirik. Ancaq onun təyinatı haqda heç nə deyilmir. Sizə köməkçi təyin olunub?
– Yox, hələ onun köməkçi olmağı təsdiq olunmayıb. Hələ onunla danışıqlar gedir. Onu da CV əsasında dəvət ediblər. Alınsa, o da köməkçi məşqçi kimi fəaliyyət göstərəcək...
– Siz baş məşqçisiniz. Bəs heyətin qurulmasında sizin rolunuz yoxdur?
– Azərbaycanlıdır. Niyə də o, köməkçim olmasın?!
– Digər köməkçiləriniz bilinir? Onlar yerli məşqçilərdir?
– Bəli. İranın sabiq baş məşqçisi köməkçim olacaq. Məndən fikrim soruşuldu. Dedim ki, qalsın işləsin. Mən əsas komanda ilə yanaşı, yeniyetmə və gənclərdə idman direktoru vəzifəsini icra edəcəyəm.
– Nə vaxtdan yeni işinizə başlayırsınız?
– İyulun 1-dən. Azərbaycanda bir az işlərim olduğundan, geri qayıdıb, onları həll edəcəyəm.
– Bunu həm də İranla Azərbaycan arasında siyasi əlaqələrin düzəlməsi ilə əlaqələndirmək olar. Belə olmasaydı, namizədlər içərisindən sizin CV-nin seçilməzdi...
– Əlbəttə. Münasibətlər əladır və məni yaxşı qarşıladılar. Federasiya prezidenti də bildirdi ki, nə şərait lazımdırsa, onu da təşkil edəcəyik.
– Federasiyada dil baxımından problem yaşamayacaqsınız?
– İngiliscə bildiyimdən, bu dildə ünsiyyət qururam. Amma federasiyada işləyən İran azərbaycanlıları da var.
– Qarşınıza hansı hədəf qoyulub?
– 4 il idi ki, İran Beynəlxalq Cüdo Federasiyası tərəfindən diskvalifikasiya edilmişdi. Artıq bu cəza aradan qaldırılıb. Onlarda perspektivli idmançılar var. Əsas məqsədimiz yeniyetmə və gəncləri Los Anceles Olimpiadasına kimi yetişdirməkdir.
Səbuhi Musa