"Qarabağ"ın 16 yaşadək komandasının futbolçusu Riad Qaradağlı bu mövsüm parlayan futbolçulardan oldu. O, 39 qolla U-16 Liqasının bombardiri ünvanına sahib çıxdı. Son 2 mövsümdə "Qarabağ"ın U-14 və U-15 komandası ilə çempion olmuş Riad bu dəfə gümüş mükafatla kifayətləndi. Əslində meydana daxil olduqdan sonra 89-cu dəqiqədə vurduğu qol matçın penaltilərə kimi uzanmasında böyük rol oynadı.
Prosport.Az saytı yeniyetmə futbolçudan müsahibə götürüb.
– "Neftçi"yə I dövrədə 6:0 və II dövrədə 2:0 qalib gəlmişdiniz. Turnir cədvəlində də bu komandanı 9 xal qabaqlayırdınız. Ancaq həlledici oyunda bu komandaya penaltilərdə uduzaraq, məğlub oldunuz. Niyə əvvəl qalib gəldiyiniz rəqibə bu dəfə uduzdunuz?
– Penaltilər bəxtdir. Burda qalib gəlmək 50%-ə bərabərdir. Bu məğlubiyyət bizim üçün də bir dərsdir. "Neftçi"ni təbrik edirəm. Ancaq gələn il başqa cür olacaq. Çempionatda top buraxmadığımız rəqibdən ilk hissədə 2 top buraxdıq. Bu da o deməkdir ki, arxayınlaşmaq olmaz.
– Penaltilər üzərində çalışmışdınız, yoxsa oyunun əsas vaxtında nəticəni xeyrinizə dəyişəcəyini düşünmüşdünüz?
– Biz oyunda qələbəyə köklənmişdik. Fikrimiz yox idi ki, oyun penaltilərə gedəcək. Özüm də penaltini qaçırdım. Halbuki çempionatda 6 dəfə penaltini qola çevirmişdim.
– U-16 Liqasında 39 qolla bombardir oldunuz. Karyeranızda ilk belə fərdi mükafatınızdır?
– Bəli, ilk dəfə belə fərdi mükafata sahib çıxırdım. İlk növbədə buna görə komandama və məşqçilər heyətinə təşəkkür edirəm. Komanda yoldaşlarımın məhsuldar ötürmələri sayəsində mən rəqib qapısına bu qədər qol vura bildim.
– Çempionatın bombardiri olsanız da, final oyununda meydana sonradan daxil oldunuz. Hər hansısa zədəniz yox idi?
– Zədəm yox idi. Sadəcə, baş məşqçimiz final üçün heyəti belə qurmuşdu. Bundan öncəki "Sumqayıt"la yarımfinalın cavab oyununda start heyətdə idim. Baş məşqçi ilə aramızda heç bir problem yoxdur.
– Bizdə olan məlumata görə, ananız da idman aləmindəndir. Bu haqda da danışardınız...
– Bəli. Anam Evelina Qaradağlı basketbol məşqçisidir. Hazırda o, aşağı yaş qrupu üzrə qızlardan ibarət millidə məşqçi işləyir (o, U-14 qız komandasında baş məşqçinin köməkçisidir – S.M.).
Səbuhi Musa