Düz 75 il əvvəl Silverstounda “Formula-1” üzrə dünya çempionatı debüt etdikdən sonra iştirakçılar növbəti mərhələ üçün Monakoya yollanmışdılar. Knyazlığın dar və dolanbac küçələri o vaxtdan bu günədək dünyanın ən sürətli sürücülərinin mübarizəsinə ev sahibliyi edir.
Prosport.Az xəbər verir ki, Monakoda məhz 75 il əvvəl debüt edən “Ferrari” həmin vaxtdan bəri çempionatda fasiləsiz iştirak edən yeganə komandadır. Buna görə də Monakoda qazanılacaq qələbə “qırmızılar” üçün xüsusi simvolik dəyər daşıyırdı. Lakin çempionatın əsas favoritlərindən olan “McLaren” bu şəhər yarışında tarixən daha çox qələbəyə sahibdir. Bu dəfə də əsas mübarizə məhz bu iki komandanın sürücüləri arasında gedib.
Monakonun dar küçələri ötmələri çətinləşdirdiyi üçün bu mövsüm burada yeni reqlament qüvvəyə minib – sürücülərə iki məcburi pit-stop tətbiq olunub. Lakin bu dəyişiklik belə, yarışın axarını ciddi dəyişməyib. Ötən il olduğu kimi, bu dəfə də ötmələr az, nəticələr isə gözlənilən idi.
Cümə və şənbə günləri keçirilən sərbəst yürüşlərdə “Ferrari”nin yerli sürücüsü Şarl Lekler ardıcıl birinci olub və poul üçün əsas favorit sayılıb. Lakin sıralanma turunun son sessiyasında Lando Norris parlaq çıxış edərək Lekleri geridə qoyub və poul mövqeyini qazanıb. İkinci sıranı isə Oskar Piastri və Lyuis Hemilton tamamlayıblar. Ferstappenin qarşısını kəsdiyi üçün Hemilton 3 yer geriyə düşüb və nəticədə niderlandlı sürücü yarışa 4-cü yerdən start alıb.
Yarışın startında ilk "onluq"da heç bir ötmə qeydə alınmayıb. Dar tras və taktiki gedişlər nəticəsində mübarizə gözləniləndən daha sakit keçib. Qasli ilə Tsunoda arasındakı təmas, həmçinin Alonsonun mexaniki nasazlıqla mübarizəni dayandırması istisna olmaqla, yarış sürprizsiz tamamlanıb.
Lando Norris poul startını qələbəyə çevirərək uşaqlıq arzusunu reallaşdırdığını bildirib. Şarl Lekler 2-ci yeri tutaraq öz ölkəsində podium sevincini yaşayıb, Oskar Piastri isə 3-cü olaraq “McLaren”ə mövsümdə daha bir dubl qazandırıb.
Ferstappen 4-cü, Hemilton isə 5-ci olub. Ayzek Həcər (“Racing Bulls”) güclü çıxışı ilə 6-cı, Esteban Okon (“Haas”) isə 7-ci yeri tutub. Liam Louson isə karyerasında ilk xallarını qazanıb.
Çempionatda fərdi mübarizədə Piastri ilə Norris arasındakı xal fərqi cəmi 3-ə enib. Ferstappen 3-cü pillədə möhkəmlənib. Mühəndislər Kubokunda “McLaren” liderliyi artırıb, arxasında isə “Mercedes”, “Red Bull” və “Ferrari” sıx mübarizə aparır.
Növbəti yarış bu həftəsonu Barselonada keçiriləcək. Yeni reqlamentə əsasən, FIA-nın ön qanadların bərkidilməsi ilə bağlı qaydası ilk dəfə bu trasda tətbiq olunacaq. Qaydaların güc balansına necə təsir göstərəcəyi böyük maraq doğurur.