Misli Premyer Liqasında XXXV tura yekun vurulub. Doğma meydanda "Kəpəz"i qəbul edən çempion "Qarabağ" 3 cavabsız qolla qalib gəlib.

Prosport.Az xəbər verir ki, oyundan sonra "Qarabağ"ın prezidenti Tahir Gözəl jurnalistlərin suallarını cavablandırıb.

– Çox sevincliyəm, "Qarabağ"sevərləri təbrik edirəm. 12-ci dəfədir ki, çempion oluruq. Böyük uğurdur. Daha 3 dəfə olsaq, 3-cü ulduzu qazanacağıq. Çox gözəl çempionat keçdi. Gələn il liqada komanda sayı artacaq. "Karvan", "Qəbələ" və "İmişli" də liqaya qoşulur. İldən-ilə bizdə futbol keyfiyyəti düzəlir, yüksəlir. Möhtəşəm axşam idi. "Qarabağ"ı təbrik edirəm. Burada əla ab-hava yaratdılar. Möhtəşəm bayram yaşadıq, hava da çox gözəl idi. "Qarabağ"sevərləri, Azərbaycanı sevindirdik. Allah qoysa, artıq Avropada yola davam edəcəyik.

– Hədəflər yəqin ki, dəyişməyib?
– Bəli, hədəflər dəyişməyib. UEFA-nın verdiyi qərardan asılıdır ki, biz ÇL-ə II, yoxsa I təsnifat mərhələsindən başlayırıq. Amma ora gəlməyin özü də elə "Qarabağ"ın futbol səviyyəsini göstərir. "Qarabağ" Avropanın orta səviyyəli klubları arasındadır. Bu hamımız üçün qürur mənbəyidir. Əlbəttə ki, biz daha da inkişaf etməyə çalışacağıq. 

– Qarşıda "Qarabağ"ı ölkə Kubokunda da oyun gözləyir. "Qızıl dubl" mümkün olacaq?
– Əlbəttə ki, bunun üçün çalışacağıq. "Sabah" rəqibimizdir, güclü klubdur. Mənim "Sabah"a xüsusi ehtiramım var. Orada futbolun kökündən gələn insanlar çalışır.Hər iki kluba da uğurlar arzulayıram, hər ikisi də bizimdir, hər ikisi də layiqdir.

– "Zirə" və "Turan Tovuz" finalda sizə azarkeşlik edir. Çünki "Qarabağ" qalib gəlsə, biri Avropa Liqasına, digəri Konfrans Liqasına yollanacaq...
– Doğrudur. "Zirə"nin baş məşqçisi Rəşad Sadıqovdur, o da mənim canımdır, bizə yaxındır. Hamısına uğurlar arzulayıram, hamısı bizim övladlarımızdır, hamısı bizim klublarımızdır. 

– 5 ildən sonra Konfrans Liqası kubokunu Azərbaycana gətirmək fikrinə necə baxırsınız?
– İnşallah, qismət olar. Elə ona görə işləməliyik. Mənə əsas nə ümid verir? Cavan oyunçularımızın meydana çıxması. Hikmət Cəbrayılzadəni, Amin Rzayevi oyunda görmək məni çox sevindirir. Gənclərimiz gəlsin. Hamısı aşağı yaş qruplarından üzə çıxan uşaqlardır. Gələcəyimiz cavanlardır. İnşallah, kuboku da Azərbaycana onlar gətirəcək.