"Daha paracüdoda çıxış edə bilməyəcək qadın idmançılar buyurub özlərini cüdoda sınaya bilərlər. Rəqabət həmişə yaxşıdır".

Bunu Prosport.Az-a Azərbaycan Cüdo Federasiyasının (ACF) icraçı vitse-prezidenti Rəşad Rəsullu deyib.

Azərbaycanın paralimpiya çempionları – Şəhanə Hacıyeva, Sevda Vəliyeva və Xanım Hüseynova artıq paracüdo yarışlarına qatıla bilməyəcək. Buna səbəb hər üç idmançının gözdən əlilliyə görə tibbi təsnifatdan keçə bilməməsidir.

Bəs həmin idmançılar yenidən idman karyeralarını necə davam etdirə bilər? Ancaq gözdən əlilliyi olmayan idmançıların yarışdığı cüdoda çıxış etməklə...

Bu məsələ ilə bağlı ACF-ə müraciət etdik. Federasiya rəsmisi onların milliyə düşməsi üçün lazım olan prosesi də açıqladı: "Hər bir idmançının amalı milliyə düşüb beynəlxalq yarışlara – dünya və Avropa çempionatlarına qatılmaqdır. Onların milliyə düşməsi üçün isə bir neçə prosesi keçmələri lazımdır. Əvvəlcə, region birinciliklərinə, məsələn, Sumqayıt birinciliyinə, daha sonra ölkə çempionatına qatılmalıdırlar. Təbii ki, bu yarışlara qatılmaları klubları tərəfindən edilməlidir. Biz heç bir idmançıya "qatıl" və ya "qatılma" tələbi irəli sürə bilmərik. Əgər Azərbaycan çempionatının qalibi olsalar, o zaman onlara yığmada yer vermək olar".

Qeyd edək ki, hər üç idmançı daha əvvəl cüdoda da çıxış edib.