Xəbər verdiyimiz kimi, Tokio-2020 Yay Paralimpiya Oyunlarının qalibi olan Şəhanə Hacıyeva Qazaxıstanda keçiriləcək görmə məhdudiyyətli cüdoçuların dünya çempionatında tibbi təsnifatdan keçə bilməyib.

Prosport.Az xəbər verir ki, Milli Paralimpiya Komitəsi (MPK) gözündə görmə məhdudiyyəti olmadığı üzə çıxan idmançı ilə bağlı açıqlama yayıb.

"Tokio-2020 Yay Paralimpiya Oyunlarında paracüdo yarışlarının keçirildiyi B1, B2 və B3 kateqoriyaları Paris-2024 Yay Paralimpiya Oyunlarınadək olan dövrdə və Paris Paralimpiadasının özündə kateqoriya sayı azaldılaraq J1, J2 kateqoriyaları üzrə təşkil edildi. Dəyişikliklər nəticəsində J2 kateqoriyasında olan bir çox göz xəstəlikləri siyahıdan çıxarıldı.

Bu səbəbdən Beynəlxalq Görmə Məhdudiyyətli İdmançılar Assosiasiyası (IBSA) tərəfindən paracüdoçularımız yenidən tibbi təsnifata cəlb edildi. Tokio-2020 Yay Paralimpiya Oyunlarının qızıl medalçısı Şəhanə Hacıyeva 2024-cü ilədək J2 kateqoriyası üzrə ölkəmizi paracüdo yarışlarında təmsil etsə də, müvafiq dəyişikliklər səbəbindən onun artıq paracüdo yarışlarında mübarizə apara bilməyəcəyi dəqiqləşib.

Dəyişən tibbi təsnifat tələblərinə adaptasiya olunması üçün Komitə tərəfindən bütün addımlar atılır.

MPK olaraq bütün idman növlərində yeni idmançı nəslinin formalaşmasında maraqlıyıq. Komitə tərəfindən ötən il təşkil edilən Uşaq Paralimpiya Oyunları, paralimpiya çempionları ilə keçirilən ustad dərsləri və təbliğat işlərimiz buna hesablanıb. Sevindirici haldır ki, yeniyetmə və gənc paralimpiyaçılarımız bu il məktəblilər arasında keçirilən Gimnaziada İdman Oyunlarında, parapauerliftinq üzrə Dünya Kubokunda, beynəlxalq badminton və parataekvondo yarışlarından Vətənə medallarla qayıdıb.

MPK olaraq daim şəffaflığın tərəfdarı olmuşuq və paralimpiyaçılarımızın beynəlxalq arenada uğurlu çıxışı üçün lazımi tədbirləri görməyə davam edəcəyik", – deyə açıqlamada bildirilir.

Qeyd edək ki, Şəhanə Hacıyevanın dünya çempionatında tibbi təsnifatdan keçə bilmədiyini ilk olaraq Prosport.Az yazmışdı.