Sabiq ağırlıqqaldıran Təranə Abbasova martın 18-də Milli Olimpiya Komitəsində (MOK) Atletlər Komissiyasına üzv seçilmişdi. Lakin dünən – mayın 12-də o üzvlükdən çıxarıldı. Onun yerinə yunan-Roma güləşi üzrə olimpiya mükafatçısı, dünya və Avropa çempionu Rafiq Hüseynov üzv seçildi.

Bəs T.Abbasova kimdir? Bu ad çoxlarına tanış olmaya bilər. Ancaq bu xanım Avstraliyanın Sidney şəhərində keçirilmiş Olimpiya Oyunlarında ağırlıqqaldırma yarışında Azərbaycanı təmsil etmiş yeganə qadın idmançımızdır. Həmin yarışda tutduğu 10-cu yer o vaxta görə türk dünyasında qadınlar arasında ən yaxşı nəticə hesab olunurdu. O, Olimpiadanın final mərhələsində ümumilikdə 165 kq (75 + 90) ağırlıq qaldırmışdı. T.Abbasova həm də I Qarabağ Müharibəsi şəhidi Nadir Abbasovun bacısıdır.

Prosport.Az 58 yaşlı Təranə Abbasova ilə əlaqə saxlayıb.

– MOK Atletlər Komissiyasında cəmi 2 ay üzv oldunuz...
– Bəli, öz istəyimlə ayrıldım.

– Niyə, nə səbəbə?
– Çünki mənim iş-gücüm yoxdur. Hər dəfə iclas, tədbir olacaq, mən məcburam ki, ora gəlməyə yol pulu xərcləyim.

– Bəyəm Bakıda yaşamırsınız?
– Mən Bakının kəndlərindən birində, rəfiqəmin bağ evində yaşayıram. Anadangəlmə xəstə bacım var, ona baxıram. Rəfiqəm bunun üçün bizə bir otaq ayırıb... Bu səbəbdən özüm yazdım ki, məni üzvlükdən çıxarın. Çünki mənim problemlərim özümə bəs edir. 2021-ci ildə məni qadın millisində məşqçilikdən çıxartdıqdan sonra "havada qalmışam". Cahangir Əsgərov federasiya prezidenti postundan ayrıldıqdan sonra baş məşqçi dəyişildi, məni də daha yığmaya çağırmadılar.

– Bəs sizə üzvlük təklif olunanda bunları nəzərə almamışdınız?
– Mənə heç nə deyilməmişdi. Sadəcə, dedilər ki, səni üzv seçmişik, filan tarixdə MOK-da olmaq lazımdır. Getdim, iştirak etdim. Daha sonra evə qayıtdıqdan sonra fikirləşdim ki, özüm çörəkpulunu güclə tapıram. Qaldığım yerdən ora getmək mənə 5 manata başa gəlir. Mən öz problemimi həll edə bilmirəm, o ki qala federasiyalardakı problemləri həll edim.

– Cəmi 1 iclasda iştirak etdiniz?
– Bəli. Komissiya 6 aydan bir yığışmalıdır. Yalnız vacib bir şey olarsa, "vatsap" qrupuna iclas barədə yazılır. Mən də elə 1 dəfə iştirak etmişəm.

– İnam Kərimovdan sonra Kamran Nəbizadə Ağırlıqqaldırma Federasiyasının prezidenti seçildi. Yeni rəhbərliyə işlə bağlı müraciət etmisiniz?
– Söz verirlər. Deyirlər ki, yadımızdasan, yaxşı olacaq, səbir elə, gözlə, düzələcək. Mən də neçə ildir ki, gözləyirəm.

– Bəs necə oldu ki, Atletlər Komissiyası üçün yada düşmüşdünüz?
– Federasiyadan mənə zəng vurmuşdular. Əvvəl mətbuat katibi Mehman Rəsulov, daha sonra baş katib Rizvan Rəsulov mənə zəng etdi. Həmçinin, MOK əməkdaşı Günay Əsgərova ilə də "vatsap"da yazdı ki, gender bərabərliyinə görə sizi Atletlər Komissiyasına üzv seçiblər. Orada dedilər ki, burada elə bilərsən ki, buna görə maaş veriləcək, yox, bizdə hər şey pulsuzdur. Sadəcə, yığışıb problemləri həll etməyə çalışacağıq. Siz mənim yerimə olsaydınız, neyləyərdiniz?... Nə bilim, əşşi. Həyat belədir də. Allah hamının köməyi olsun...

– Onda belə başa düşürəm ki, federasiyanın sizə "iş verəcəyik" deməsi də elə bu imiş...
– Bəli, ola bilər. Heç kimlə əlaqəm yoxdur. Sadəcə, yarışdan yarışa yalnız hakimlik üçün gedirəm. O da 2 gün yarış olur, gününə cəmi 50 manat verilir.

– Bəs sizə təqaüd verilmir?
– Xeyr. Yalnız Cahangir müəllimin vaxtında aya 200 manat alırdım. Ondan sonra hər şey kəsildi. Halbuki 1991-ci ildə ağırlıqqaldırmada qadınların iştirakına icazə veriləndə ilk dəfə Moskvada olimpiya mükafatçısı, dünya və Avropa çempionu Qriqori Novakın adına keçirilən beynəlxalq turnirdə iştirak etmişəm. Onda 18 ölkə arasında yeganə müsəlman ölkəsindən mən yarışırdım. O vaxt mən sinklerdə qalib gəlmişdim.

Səbuhi Musa