Qubada təşkil olunan yeniyetmə cüdoçular arasında Avropa Kuboku başa çatıb.

Prosport.Az xəbər verir ki, yarışın 2-ci – sonuncu günündə daha 8 çəki dərəcəsində qaliblər müəyyənləşib.

Azərbaycan cüdoçuları sonuncu günü 6 medalla (3 gümüş, 3 bürünc) başa vurub. Səid Şərifov (73 kq), Amin Mehdiyev (81 kq) və Səid Hüseynov (90 kq) gümüş medalla kifayətlənib. Məhəmməd Ağakişiyev (73 kq), Sübhan Axundov və Tunar Fərzəliyev (hər ikisi +90 kq) bürünc medala sahib olub.

Qeyd edək ki, daha əvvəl Azərbaycan yığması 12 medal (3 qızıl, 3 gümüş və 6 bürünc) qazanıb. Anar Quliyev (50 kq), Zeyd Ələsgərov (60 kq), Nuranə Hacızadə (48 kq) qızıl, Rəsul Əlizadə (55 kq), Fəxri Sahibzadə (66 kq), Leyla Ələkbərova (48 kq) gümüş, İbrahim Talıbov, Rza Xəlilli (hər ikisi 50 kq), Röyal Qayıbov (60 kq), Hüseyn Hüseynov (66 kq), Xədicə Abdullayeva (44 kq) və Aysun Məmmədova (52 kq) bürünc medala yiyələnib.

Yekunda 3 qızıl, 6 gümüş və 9 bürünc olmaqla, ümumilikdə 18 medal qazanan Azərbaycan yığması Avropa Kubokunda komanda hesabında 2-ci yeri tutub. İlk sıranı Rusiya cüdoçularının yarışdığı Beynəlxalq Cüdo Federasiyası (IJF) tutub – 10 qızıl, 6 gümüş, 10 bürünc medal. Gürcüstan 1 qızıl, 2 gümüş və 4 bürünc medalla 3-cü olub.

Qeyd edək ki, Azərbaycan ilk dəfə Qubada keçirilən bu yarışa 141 cüdoçu (100 oğlan, 41 qız) ilə qatılmışdı.