Azərbaycan Velosiped Federasiyasının növbədənkənar ümumi yığıncağı keçirilib.

Prosport.Az xəbər verir ki, tədbir Dövlət Himnimizin səsləndirilməsi ilə başlanıb.

Gənclər və idman naziri Fərid Qayıbov yığıncağı açıq elan etdikdən sonra federasiyanın baş katibi Elnarə Musayeva ötən dövr ərzində görülən işlərin hesabatını təqdim edib. Federasiya prezidenti Mədət Quliyev təşkilata rəhbərlik etdiyi müddətdə bu idman növünün inkişafı üçün əlindən gələni etdiyini bildirərək istefa verib və yeni seçiləcək federasiya rəhbərliyinə uğurlar arzulayıb.

Daha sonra Azərbaycan Velosiped Federasiyasının rəhbərliyinə seçki keçirilib. “Silk Way” Şirkətlər Qrupunun prezidenti Zaur Axundov federasiyanın prezidenti seçilib. Sahib Ələkbərov I vitse-prezident, Robert Eyyubov və Fikrət Hüseynov vitse-prezidentlər, Rəşad Gülmalıyev, Emin Mustafayev, Albert Pitersma isə İcraiyyə Komitəsinin üzvləri seçilib.

Zaur Axundov bu idman növünün inkişafı üçün əlindən gələni edəcəyini bildirib.

Qeyd edək ki, Zaur Axundov vaxtı ilə mövcud olmuş və Şüvəlan qəsəbəsində fəaliyyət göstərmiş AZAL futbol klubuna da rəhbərlik edib. O, həmçinin AFFA-nın İcraiyyə Komitəsinin və Azərbaycan Voleybol Federasiyasının İdarə Heyətinin üzvlərindən biridir.