Monteneqronun paytaxtı Podqoritsada keçirilən cüdo üzrə Avropa çempionatını Azərbaycan qızıl medalsız başa vurub.

Prosport.Az-ın xəbərinə görə, son gündə qarışıq komandamız 1/8 finalda Gürcüstan millisinə 0:4 uduzaraq erkən mübarizəni dayandırıb.

Belə ki, Günel Həsənli (+70 kq), Zelim Kotsoyev (+90 kq), Fidan Əlizadə (57 kq) və Rəşid Məmmədəliyev (73 kq) gürcü həmkarları ilə görüşlərində uduzub.

Bununla da olimpiya, dünya və Avropa çempionu Hidayət Heydərovsuz Azərbaycan yarışı 5 medalla – 1 gümüş və 4 bürünc mükafatla başa vurub. Zelim Kotsoyev (100 kq) gümüş, Əhməd Yusifov (60 kq), Rəşid Məmmədəliyev (73 kq), Zelim Tçkayev (81 kq) və Murad Fətiyev (90 kq) bürünc medal qazanıb.

Xatırladaq ki, ötən il Xorvatiyanın paytaxtı Zaqrebdə keçirilmiş Avropa çempionatında Azərbaycan 2 qızıl və 1 gümüş medalla 3-cü olmuşdu. 2023-cü ildə Fransanın Monpelye şəhərində keçirilmiş Avropa çempionatında isə 2 qızıl medalla 1-ci yeri tutmuşduq. 2022-ci ildə Bolqarıstanın paytaxtı Sofiyada keçirilmiş qitə çempionatında isə 1 qızıl və 2 bürünc medalla 8-ci olmuşduq. Yalnız komandamız 2021-ci ildə Portuqaliyanın paytaxtı Lissabonda keçirilmiş Avropa çempionatında 2 bürünc medal qazanmaqla 15-ci olmuş və zəif nəticə göstərmişdi.

Qeyd edək ki, yığmamız bu nəticə ilə hazırda 10-cu yerdədir. Komanda yarışı başa çatdıqdan sonra yekun turnir cədvəli bəlli olacaq.