"Azərreyl" voleybol klubunun prezidenti Ramin Əzizovun Prosport.Az saytına müsahibəsi

– Səmimi olsaq, cari mövsüm "qızıl dubl" edəcəyinizi gözləyirdinizmi?
– 100% gözləyirdim.

– Amma mövsümə çox pis başlamışdınız...
– Mövsümün hazırlığına gec başladıq. Sentyabr ayından etibarən transferlərə start verildi. Məşqçi və oyunçu seçimində bir xeyli çətinliklərimiz oldu. Voleybol mütəxəssisləri də etiraf edər ki, sentyabrda komanda yığmaq çox çətin məsələdir. Çünki həmin ərəfədə lazımi oyunçuların müqavilələri olur, rəqiblər isə heyətlərini qurmuş olur. Ən gec biz komanda yığdıq. Düzdür, çempionatın ilk oyunlarında yaxşı təsir bağışlamasaq da, həm kişi, həm də qadın komandamız toparlana bildi. Bu da bizim düzgün sistemli işləməyimizin, düzgün məşqçi seçimimizin nəticəsidir. Komandalarımız sonadək döyüşdü. Heç vaxt ümidimi itirmədim ki, hər iki komandamız çempion olacaq. Nəticədə də istədiyimiz çempionluğu əldə etdik.

– Ümumiyyətlə, mövsümü "Azərreyl" üçün uğurlu adlandırmaq olar. Əvvəl çimərlik voleybolu üzrə Avropa Kubokunda, daha sonra qar voleybolu üzrə Azərbaycan çempionatında, sonda klassik voleybol üzrə ölkə çempionatında qızıl medalları qazandınız...
– Tamamilə doğru buyurursunuz. Çox yaxşı təcrübə qazandıq. Bu prosesin gedişində çox şeyləri öyrəndik. İnanıram ki, bu təcrübədən qarşıdakı illərdə də yararlanacağıq.

– Klub prezidenti kimi ilk mövsümünüz idi. Nələri öyrəndiniz?
– İlk növbədə transferlərə gecikməməyi. Düzgün məşqçi seçimi, nizam-intizam vacibdir. Köhnə idmançı, taekvondoçu kimi zatən bilirdim ki, intizam olmadan nailiyyət mümkün deyil. Məni klub prezidenti kimi oyunçulara təqdim etmişdilər. Amma voleybolçulara izah etdim ki, mən də bir idmançı olmuşam. Pley-off mərhələsində də onlarla psixoloji danışığımız oldu. Onları yaxşı motivasiya edə bildim. Bu da yəqin mənim keçmiş karyeramdan irəli gəlir. Orada bir idmançı nə hiss edə bilər, nə çətinlikləri ola bilər – bunların hamısını izah etdim. İstədim ki, məni klub prezidenti kimi yox, bir idmançı kimi başa düşsünlər. Hamısına təşəkkür edirəm. Həqiqətən məni böyük qardaşları kimi qəbul etdilər.

– Qadınlardan ibarət komandanın italiyalı baş məşqçisi Paolo Tofolinin müqaviləsinin müddəti başa çatdı. Onunla yeni müqavilə bağlanılacaqmı?
– Hələ bu barədə danışmaq tezdir. Onunla bu barədə danışmamışıq. Çox yaxşı mütəxəssisdir. O da komandaya gec gəldi. Buna baxmayaraq, yüksək nəticə əldə etdi. Onun da burada haqqı danılmazdır.

– Öncəki mövsüm "Azərreyl"lə "qızıl dubl" etmiş Orxan Kərimovla yollar ayrıldı. Siz də oxşar nəticəni təkrarladınız. "Azərreyl"də qalırsınız?
– Əlbəttə ki, bu, federasiya rəhbərliyinin qərarından asılıdır. Bizim qarşımıza tapşırıq qoyuldu. Şadıq ki, həmin tapşırığı yerinə yetirə bildik. Ötən mövsüm qadın komandasında durum başqa cür idi. Komanda avrokubok üçün yığılmışdı. Amma builki komandamız Azərbaycan çempionatında rəqiblərlə bərabər gücdə idi. Hətta deyərdim ki, o biri komandalarla müqayisədə büdcəmiz aşağı idi. Amma gördüyünüz kimi, düzgün iş qoyaraq çempion olduq.

– Mövsümün əvvəlində komanda avrokuboklarda çıxış etmədi. Bəs bu dəfə necə?
– Planda var. Ya CEV, ya da Challenge Cup-da çıxış edəcəyik. Bu barədə kollektivlə müzakirə apardıqdan sonra qərar verəcəyik.

Səbuhi Musa