Azərbaycan cüdoçusu Zelim Kotsoyev (100 kq) Monteneqronun paytaxtı Podqoritsada keçirilən Avropa çempionatında gümüş medalla kifayətlənib.

Prosport.Az xəbər verir ki, Paris Olimpiadasının qalibi 1/8 finalda Aristos Mixaeli (Kipr) ipponla, 1/4 finalda Maksim Duynovu (Latviya) 3 şido xəbərdarlığı ilə, yarımfinalda Anton Savitskini (Ukrayna) vaza-ari ilə məğlub edərək finala çıxıb.

Lakin osetin əsilli idmançımız həlledici görüşdə olimpiya və dünya mükafatçısı gürcüstanlı İlya Sulamanidzeyə yuko balı ilə məğlub olub. Ona gümüş medalı olimpiya çempionumuz, Azərbaycan Cüdo Federasiyasının vitse-prezidenti Elnur Məmmədli təqdim edib.

Digər cüdoçumuz Uşanqi Kokauri (+100 kq) isə Patrik Bronyetsi (Polşa), Marius Fizeli (Slovakiya) və Rəcəp Ərgini (Türkiyə) məğlub etsə də, yarımfinalda rusiyalı Valeri Yendovitskiyə və bürünc medal görüşündə Almaniyanı təmsil edən Erik Abramova uduzub. Gürcü legionerimiz son görüşdə vaza-ari ilə öndə olsa da, ippona düşüb.

Nigar Süleymanova (+78 kq) ilk görüşündə Sofio Somxişviliyə (Gürcüstan) 3 şido xəbərdarlığı ilə uduzub. Bununla da Azərbaycan fərdi yarışları qızıl mükafatsız – 1 gümüş və 4 bürünc medalla başa vurub. Xatırladaq ki, daha əvvəl Əhməd Yusifov (60 kq), Rəşid Məmmədəliyev (73 kq), Zelim Tçkayev (81 kq) və Murad Fətiyev (90 kq) bürünc medal qazanmışdı. Bu nəticə ilə Azərbaycan medal sıralamasında 10-cu yerdədir.

Qeyd edək ki, yığmamız, həmçinin qarışıq komanda yarışında mübarizə aparacaq. Komandamız sabah 1/8 finalda Gürcüstan millisi ilə qarşılaşacaq.