Azərbaycan Dünya Badminton Federasiyasının (BWF) ali orqanında təmsil olunacaq.

Prosport.Az xəbər verir ki, bu gün Çinin Siamen şəhərində BWF-in 86-cı illik ümumi yığıncağı keçirilib. 143 ölkədən nümayəndə heyətinin qatıldığı iclasda Azərbaycan Badminton Federasiyasının (ABF) nümayəndələri də iştirak edib.

Tədbirdə 2025-2029-cu illər üçün BWF prezidenti və ali idarəedici orqanı sayılan Şuraya və eyni zamanda İcraiyyə Komitəsinə seçkilər keçirilib. ABF-nin prezidenti Taleh Ziyadov 4 il müddətinə Avropa qitəsindən Şuraya üzv seçilib.

BWF-in mövcud qaydalarına görə 20 yeni seçilmiş Şura üzvləri qurumun inkişaf strategiyası, komitə rəhbərlərini, daxili və xarici nizamnamə qaydalarını müəyyən edəcək.

Tailand Badminton Federasiyasının prezidenti Kunyinq Patama Leesvadtrakul BWF-nin rəhbəri seçilib.