"Quba"nın basketbolçusu Levan Qoqaladze klubun mətbuat xidmətinə müsahibə verib.

Prosport.Az xəbər verir ki, gürcüstanlı legioner pley-in mərhələsində başa vurduqları mövsümü dəyərləndirib.

– Mövsüm "Quba" üçün pley-in mərhələsində başa çatdı. Komanda "Ordu"ya məğlub olaraq, iştirakını dayandırdı. Sizcə, nəyə görə komanda uduzdu?
– Bu, yaxşı və qısa seriya idi. Təəssüf ki, komandaya kömək edə bilmədim. Üstəlik, ilk oyunda Zaur Paşayev meydana çıxa bilmədi. Fikrimcə, həmin seriyada meydana olsaydım, pley-offda oynayardıq.

– "Ordu"ya qarşı görüşlərdə zədəli olduğunuz üçün iştirak etmədiniz. İlk oyundan öncə məşqdə zədələnmişdiniz və başınıza tikil atılmışdı. İndi durumunuz necədir?
– Bəli, qeyd etdiyim kimi komandaya kömək edə bilmədim. Oyundan öncə keçirilən məşqdə bəxtsizlik yaşadım. Başımdan zədələndim və tikiş atıldı. İndi özümü yaxşı hiss edirəm.

– Artıq 3 ildir ki, ölkəmizdə legioner həyatı yaşayırsınız. Azərbaycan basketbolunda inkişaf görürsünüz?
– Azərbaycanda basketbol inkişaf edir. Fikrimcə, oyunlara daha çox uşaq gətirmək lazımdır. Həmçinin daha mütəşəkkil baş menecerlər və bu cür bəzi addımlar da liqanın xeyrinə işləyəcək.

– Gürcüstan və Azərbaycan basketbolunu necə müqayisə edərdiniz?
– Fikrimcə, xarici oyunçuların səviyyəsi demək olar ki, eynidir. Çünki Azərbaycanda oynamış bir çox oyunçu əvvəllər elə Gürcüstanda da çıxış edib. Bu 2 ölkə klubları arasında fərq komandalardakı intizam və yerli oyunçulardadır.

– Sizcə, "Quba" müntəzəm mövsümdə də nəyə görə uğursuz çıxış etdi? B qrupunda sonuncu yerdə olmasanız da, yalnız 1 pillə yuxarıda qərarlaşdınız...
– Diqqətimizi mövsümün sonuna fokuslamışdıq. Düzü, irəlidəki komanda ilə aramızda fərq də çox deyildi. Pley-in matçlarında göstərdik ki, tam heyətlə olmasaq belə, istənilən komandaya qarşı yaxşı mübarizə aparıb, yaxşı seriya əldə edə bilərdik.

– Yeni mövsümə də "Quba"da, Azərbaycan Basketbol Liasında başlayacaqsınız?
– Biz bunu hələ müzakirə etməmişik. Necə olacağını zaman göstərəcək. Mən baş məşqçimiz Şəhriyar Əsgərova və kapitanımız Zaur Paşayevə hörmətlə yanaşıram. Onlara hər zaman ən yaxşısını arzulayıram.

– Sizcə, ABL-də hansı komanda çempion olacaq?
– Məncə, “Sabah” yenə qalib gəlmək üçün favoritdir. Baş məşqçi Rimas Kurtinaytis çox yaxşı komanda qurub.