"Formula 1" üzrə dünya çempionatının 5-ci mərhələsi Səudiyyə Ərəbistanın ən böyük sənaye şəhəri olan Ciddənin dənizkənarı parkında yerləşən trasda başa çatıb.
Prosport.Az xəbər verir ki, ötən həftəsonu baş tutan Bəhreyn Qran-prisindən sonra çempionatda cəmi 8 xal fərqlə sıralanan Lando Noris, Oskar Piastri (hər ikisi “McLaren”) və Maks Ferstapen (“Red Bull”) bu mərhələdə üstünlüyü ələ almağa iddialı olub. Günəş altında 60 dərəcəyə çatan asfalt üzərində keçirilən ilk sərbəst yürüşlərdə “Alpine” sürücüsü Pyer Qasli ən sürətli nəticə göstərərək sürpriz edib. Lakin növbəti 2 sessiyada favorit "3-lük" əsl gücünü nümayiş etdirib və sıralama turunda əsas iddiaçılar olub.
Poul uğrunda mübarizədə isə gözlənilməz hadisə baş verib. Noris 5-ci döngədə səhv edərək yürüşü yarımçıq qoyub. Bu vəziyyətdə əsas favorit kimi Piastri ön plana çıxsa da, son 4 ilin çempionu Ferstapen möhtəşəm dövrə ataraq onu cəmi 0.01 saniyə qabaqlayıb poul mövqeyini qazanıb.
Yarışın taleyi isə artıq ilk döngədə həll olunub. Startda zəif çıxış edən Ferstapen Piastrini kənardan keçərək liderliyə yüksəlib. Lakin stüardların mövqeni geri qaytarmaq tələbinə əməl etmədiyi üçün 5 saniyəlik cərimə alıb. Pit-stoplaradək mövqelər dəyişmədiyindən Maks təkər dəyişərkən cəriməsini çəkib və trasa Piastrinin arxasında qayıdıb.
Niderlandlı sürücü sonadək təzyiq göstərsə də, Piastri liderliyini qoruyaraq mövsümdə 3-cü qələbəsini qazanıb. Maks isə pouldan başladığı yarışda 2-ci olub.
Podiumun 3-cü pilləsi uğrunda isə ciddi mübarizə yaşanıb. Startda bu mövqedə “Mercedes”dən Corc Rasl yer alsa da, daha gec pit-stop edən “Ferrari” pilotu Şarl Lekler onu qabaqlayıb. Şənbə günü qəza keçirərək 10-cu yerdən başlayan Lando Noris isə yarışın sonunda Corcu geridə qoyub podium uğrunda Şarla yaxınlaşsa da, monakolu sürücünü keçə bilməyib. Nəticədə Şarl həm özünün, həm də “Ferrari”nin bu mövsümdə ilk podiumunu qazanıb. Lando isə ilk dəfə podiumsuz qalıb.
Finişdə sonrakı yerləri “Mercedes” sürücüləri tutub. Debütant Andrea Kimi Antonellinin 6-cı yeri xüsusi qeyd olunmalıdır. Startda 7-ci olan yeddiqat dünya çempionu Lyuis Hemilton isə yarışı elə həmin mövqedə başa vurub. İlk "10-luğ"u isə “Williams” sürücüləri – Karlos Sayns və Aleks Elbon, eləcə də “Racing Bulls”dan Ayzek Həcər tamamlayıb.
Bu nəticədən sonra Oskar Piastri karyerasında ilk dəfə olaraq çempionatın lideri olub. Onun 99 xalı var. Komanda yoldaşı Lando Norisdən 10 xal öndədir, Maks Ferstapen isə onlardan 2 xal geridə qalır. Komanda hesabında isə “McLaren” 188 xalla aşkar liderliyini davam etdirir.
İndi komandaları 2 həftəlik fasilə gözləyir. Gələn yarış isə mayın əvvəlində okeanın o tayında – Mayamidə şəhər trasında keçiriləcək.