Azərbaycanın akrobatika üzrə milli komandası Lüksemburqda təşkil olunmuş Avropa çempionatında 8 medal qazanıb.

Prosport.Az xəbər verir ki, sonuncu yarış günündə iki medal əldə olunub.

Seymur Cəfərov, Abdulla Əl-Məşayxi, Rəsul Seyidli və Riad Səfərovdan ibarət kişi qrupu temp hərəkətlərində 28.020 xalla, Murad Rəfiyev və Daniel Abbasovdan ibarət kişi cütlüyü balans hərəkətlərində 28.570 xalla gümüş medala yiyələnib.

Daha əvvəl temp hərəkətlərində Ağasif Rəhimov və Raziyə Seyidlidən ibarət qarışıq cütlük qızıl, balans və qarışıq hərəkətlərdə Daniel Abbasov və Murad Rəfiyevdən ibarət kişi duet gümüş medal əldə edib.

Bürünc medallara isə Anaita Bəşiri, Zəhra Rəşidova, Nəzrin Zeyniyevadan ibarət qadın, Abdulla Əl-Maşayxi, Riad Səfərov, Rəsul Seyidli və Seymur Cəfərovdan ibarət kişi və yeniyetmələrin mübarizəsində Diana Məmmədova, Firuzə Qasımova və Safiyə Babayevadan ibarət qızlar qrupu sahib çıxıb.

Beləliklə, Azərbaycan millisi 1 qızıl, 4 gümüş və 3 bürünc medalla vətənə dönür.