“Güclü rəqibə qarşı oynadıq. Xorvatiya millisi qrupda keçirdiyi 6 oyunun hamısında qələbə qazandı və maksimum xalla Avropa çempionatının final mərhələsinə yollandı. Komandamız bu gün yaxşı çıxış etdi. Adətən 2-ci hissədə çatdırmırdıq və oyundan qopurduq. Bu dəfə güclü rəqibə qarşı yaxşı mübarizə apardılar".

Prosport.Az xəbər verir ki, bunu futzal millimizin baş məşqçisi Vitali Borisov bildirib.

O, Avropa çempionatının əsas seçmə mərhələsində Xorvatiyaya Bakıda 1:4 hesabı ilə uduzmalarından danışıb. O bildirib ki, zədəli oyunçularla meydana çıxıblar: "Heyətimizdə zədəli futzalçı çoxdur. Əksəriyyəti ağrıkəsici hesabına meydana çıxmışdı. Ancaq bunu hiss etdirmədilər.

Rövşən Hüseynli (qapıçı nəzərdə tutulur – red.) ilə bağlı nə lazımdırsa danışmışıq, məlumat vermişik. Onu bu toplanışdan kənarlaşdırmışıq, amma millinin qapıları növbəti toplanışlarda onun üzünə açıqdır. Bu hamımızın millisidir. Bu gün buraxdığımız qolların heç birində qapıçının səhvi olmadı”.