Azərbaycan kikboksçusu Fərid Ağamoğlanov Polşada keçirilən III Avropa Oyunlarına uğurlu start verib.

63,5 kq çəki dərəcəsində döyüşən idmançımız 1/4 finalda slovakiyalı Filip Barakı 3:0 hesabı ilə məğlub edib.

Prosport.Az-ın Polşaya ezam olunmuş əməkdaşı Fərid Ağamoğlanovun müsahibəsini təqdim edir.

- Yarışdakı ilk görüşünlə bağlı təəsüratlarını bölüşərdin.

- Biz artıq lisenziya xarakterli yarışlarda rəqiblərimizi tanıyırıq. Bütün rəqiblərə qarşı yüksək səviyyədə hazırlaşmışıq. Məqsədimiz ancaq çempion olub bayrağımızı qaldırmaqdır. Çox yaxşı məşqlərdən keçmişik. Kikboksinq Federasiyası rəhbərliyi sağolsun hər cür bizə şərait yaratdı. Çox sağol deyirəm. İnşallah bizim hədəfimiz qızıl medaldır. Yaşasın Azərbaycan xalqı, yaşasın Azərbaycan.

- Sanki növbəti mərhələlər üçün gücünü qorumağa çalışırdın...

- Bəli, döyüşdən əvvəl müəllimlərimizlə planlaşdırılmışdı ki, əsas məqsəd açılışmaqdır. İlk görüş bir az ağır olur, tam gücü qoymaq olmur. Çünki qarşıdakı rəqiblər daha da güclü olur. Ona görə gücümüzü növbəti döyüşlərə saxlamışıq. Yəni hər döyüşə fərdi şəkildə yanaşırıq. Bu döyüşə də müəllim (Eduard Məmmədovu nəzərdə tutur - S.M.) belə məsləhət gördü və mən də belə döyüşdüm. Şükür Allaha, qələbə qazandım.

- 2-ci raundda rəqibini nokauta sala bilərdin?

- Bəli, sala bilərdim. Sadəcə olaraq müəllimim bilir ki, ehtiyac yoxdur. Yəni döyüşmək, açılışmaq lazım idi.  Müəllimin sözünə qulaq asmaq lazımdır. Müəllimin sözünə qulaq asan həmişə xeyir tapar. İnşallah ki, növbəti döyüşlərimiz daha da yaşı olar və biz qızıl medal qazanarıq.