Xorvatiyanın Dubrovnik şəhərində böyüklər arasında keçirilən cüdo üzrə Avropa Kuboku yekunlaşıb.

Prosport.Az xəbər verir ki, 2-ci yarış günü Azərbaycan milli komandası üçün uğurlu alınıb. Cüdoçularımız 3 qızıl, 2 gümüş və 1 bürünc medala sevinib.

Kişilərin mübarizəsində 90 kq-da çıxış edən Murad Fətiyev finalda Tokio Olimpiadasının gümüş mükafatçısı Eduard Tripelə (Almaniya) qalib gələrək çempion olub. Bu çəki dərəcəsində Vüqar Talıbov bürünc medalı boynundan asıb. Daha bir kişi cüdoçumuz Kərim Allahverdiyev isə 81 kq çəkidə gümüş medalın sahibi olub.

Qadınlar arasında 52 kq çəki dərəcəsində Azərbaycan finalı baş tutub. Aydan Vəliyeva fəxri kürsünün 1-ci, Gültac Məmmədəliyeva isə 2-ci pilləsinə qalxıb. 57 kq-da Fidan Əlizadə keçirdiyi 4 görüşün hamısında rəqiblərindən üstün olaraq millimizin hesabına daha 1 qızıl medal əlavə edib.

İlk yarış günündə Kamran Süleymanov (73 kq) və Nərmin Əmirli (78 kq) 3-cülüklə yadda qalmışdı.

Yekunda Azərbaycan milli komandası 3 qızıl, 2 gümüş və 3 bürünc medalla Avropa Kubokunda 39 ölkə arasında 1-ci olub.