“Quba”nın ABŞ-dan olan basketbolçusu Calen Reyndols klubun mətbuat xidmətinə müsahibə verib.

Prosport.Az həmin müsahibəni təqdim edir:

- “Quba” müntəzəm mövsümdə son oyununa çıxacaq. “Ordu” ilə görüş haqda nə düşünürsünüz, qalib gələ biləcəksiniz?
- “Ordu”ya qarşı çox yaxşı oyun olacağını düşünürəm. Müntəzəm mövsümü qalibiyyətlə başa vurmaq istəyirik. Tam olaraq hazırda buna fokuslanmışıq. Buna görə də sona qədər mübarizə aparacağıq. 

- Ölkə çempionatında uzun fasilə yaranıb. Bu fasiləni harada keçirdiniz? 
- Mən fasiləni Bakıda keçirdim, başqa ölkəyə getmədim. Elə burada Novruz bayramını da qeyd etdim. İlk dəfə idi ki, Novruz bayramını qeyd edirdim. Maraqlı idi.

- “Quba” Azərbaycan çempionatında demək olar ki, uğursuz çıxışını davam etdirir. Sizcə, məğlubiyyətlərin səbəbi nədir?
- Bu mövsüm liqada hər kəslə oynaya biləcəyimizi göstərdik. Məğlubiyyətimizin bəzi səbəbləri isə yorğunluğun yaratdığı səhvlər idi. Yorğun olduğumuz zaman müdafiədə də səhvlərə, foullara yol verirdik. Atışlarda da bəzən dəqiq ola bilmirdik. Bu da sonda istədiyimiz nəticəni qazanmağa imkan vermirdi. Daha çox zehni olaraq hazırlaşmalı və daha sərt təkan verməliyik.

- “Quba” pley-in oyunları keçirəcək. Heç olmasa burada uğurlu ola biləcəksiniz?
- Müntəzəm mövsüm bitəcək və yeni startımız olacaq. Ona görə də düşünürəm ki, burada uğur qazanacağıq. Bizə təzyiq olduğunu düşünmürəm. Çünki qalib gələcəyimizi gözləyənlər çox deyil. Əsas basqının “Ordu”da olduğunu fikirləşirəm.

- Azərbaycan Basketbol Liqasında özünüzü yaxşı tərəfdən göstərə bildiyinizi düşünürsünüz? “Quba”dakı karyeranız istədiyiniz kimi gedir? 
- Düzü, ilk oyunlara daha yavaş başlamışdım. Amma liqaya oyundan-oyuna öyrəşməliydim. Karyeramın istədiyim kimi başladığını hiss edirəm. Lakin hər zaman təkmilləşmək üçün imkan var.