Avropa çempionatının əsas mərhələsində çərçivəsində 19 yaşadək futzalçılardan ibarət Azərbaycan millisi (U-19) növbəti oyununu keçirib.

Prosport.Az xəbər verir ki, komandamız Xorvatiyadan olan həmyaşıdları ilə qarşılaşıb.

İlk matçla müqayisədə baş məşqçi İlqar Aslanov “5-lik”də 2 dəyişiklik edib. Qapıda bu dəfə Hüseyn Abdulov yer alıb. Nazim Hüseynovun əvəzinə isə Oqtay Mahmudzadə ilk saniyələrdən meydanda olub.

Qrupun favoritlərindən sayılan xorvatlar 3-cü dəqiqədə hesabı açsa da, futzalçılarımız fasiləyə üstün yollanmağı bacarıb. 7-ci dəqiqədə Fariz Hüseynov tablodakı rəqəmləri eyniləşdirib. 10 dəqiqə sonra Ədalət Ələkbərov millimizi hesabda önə keçirib.

2-ci hissədə də komandamızın fərqi artırmaq üçün imkanları olub. Ancaq 27-ci dəqiqədə yığmamız meydanda azlıqda qalıb. Komandanın kapitan sarğısını da daşıyan qapıçı Abdulov rəqib hücumun qarşısını alan zaman cərimə meydanından kənarda topu əli ilə qaytarıb ki, belədə referi qırmızı vərəqədən istifadə etməli olub. 2 dəqiqə azlıqda mübarizə aparan futzalçılarımız rəqibə fərqlənmək imkanı verməyib. 35-ci dəqiqədə hesab yenidən bərabərləşdirib. Son dəqiqə azı 2 epizodda futzalçılarımız topu rəqibdən “oğurlasa” da boş qapıya düşə bilməyib. Meydan sahibləri isə 12 saniyə qalmış hesabı xeyrinə dəyişib. Amma sona qədər mübarizəni davam etdirən futzalçılarımız son saniyə qolu ilə tarixi nəticə qazanıb. Belə ki, bu heç-heçə U-19-un əsas mərhələdə qazandığı ilk xal olub.

Millimiz qrupda son oyununu martın 29-da Türkiyə yığmasına qarşı keçirəcək. Görüş Bakı vaxtı ilə saat 19:00-da başlayacaq.

Xatırladaq ki, 1 gün əvvəl U-19 komandamız Bosniya və Herseqovinayaya 2:10 hesabı ilə uduzub.