Ötən ilin sonlarında Sloveniyanın "Maribor" klubunun idman direktorunun köməkçisi Markus Tavaris Bakıda səfərdə oldu.

"Maribor"un əfsanəsi sayılan (2008-2022-ci illərdə Sloveniya çempionatında 436 oyuna 159 qol vurub – red.), "Qəbələ"yə UEFA Avropa Liqasında vurduğu qollarla da tanıdığımız braziliyalı Prosport.Az-a müsahibə verib.   

– Bilirik ki, dekabrda "Araz-Naxçıvan"ın braziliyalı hücumçusu Felipi Sentusun dəvəti ilə Bakıya gəlmişdiniz. Hətta həmin komandanın "Sabah"la keçirdiyi oyunu da canlı izləmişdiniz. Çempionatımız haqda nə deyə bilərsiniz? 
– Son illərdə inanıram ki, Azərbaycan çempionatındakı rəqabət böyüyüb. Biz görürük ki, Azərbaycan klubları Avropa yarışlarında yaxşı oynayır. Dostum Felipi Sentus da ölkənizdə heyrətamiz çıxış edir. O, çoxlu qollar vurur. Çempionatın bombardirlərindən biri olduğunu, məhsuldar ötürmələrinin olduğunu bilirəm. Azərbaycan çempionatını ona görə bəyənirəm ki, çoxlu keyfiyyətli əcnəbi orada oynayır.

– Siz Bakıda olduğunuz müddətdə "Qarabağ" Akademiyasının oyununu da izlədiniz...
– Bəli. Orada yaxşı istedadı olan və yüksək səviyyədə oynaya biləcək futbolçular gördüm. İnanıram ki, klublar infrastruktura daha çox sərmayə yatırsalar, gələcəkdə Azərbaycan futbolu Avropada adından söz etdirə bilər. Akademiyanın oyununa məni dostum, "Qarabağ" Akademiyasının idman direktoru (menecer Nail Kərimovu nəzərdə tutur – red.) dəvət etmişdi. Onu Avropa Klublar Assosiasiyasının (ECA) gənclərlə işçi qrupundan tanıyıram. Ola bilsin ki, gələcəkdə "Maribor"la "Qarabağ" arasında oyunçu mübadiləsi baş versin. "Maribor"dan da "Qarabağ"a futbolçu keçə bilər.

– Bakını isə öz həyat yoldaşınızla birgə gəzdiniz. İçərişəhərdə – Qız Qalasında, Zəfər Parkında oldunuz. Şəhər hansı təəssüratla yadınızda qaldı?
– Şəhəriniz möhtəşəmdir, təmizdir. Gözəl binalar var. Azərbaycan tarixinə aid tikililər də göz oxşayır. Həyat yoldaşımla muzeyə də baş çəkdik. Çox mehriban ölkədir. Ola bilsin ki, bir gün yenidən Bakıya qayıdım. "Formula-1"i Bakıda izləmək xoş olardı. Zəfər Parkında olanda Felipi mənə buranın önəmini, niyə salındığını da izah etdi.

– İlk dəfə 2016-cı ildə Bakıda olmuşdunuz. UEFA Avropa Liqasının pley-off mərhələsi üçün "Maribor"un futbolçusu kimi "Qəbələ"yə qarşı oynamağa gəlmişdiniz...
– Bəli, çətin oyun alınmışdı. Biz yaxşı oynamışdıq. Ancaq qalib gələ bilməmişdik. Süni örtüklü meydançada oynamaq bizim üçün çətin idi (18 avqust 2016-cı ildə keçirilmiş həmin matç ovaxtkı "Dalğa Arena", indiki "Liv Bona Dea Arena"da baş tutmuşdu – red.).

– Azərbaycanda bir neçə braziliyalı da oynayır. Onlardan tanıdıqlarınız var?
– Xeyr. Şəxsən tanıdığım yalnız Felipi Santusdur. Ancaq "Qarabağ"da oynayan monteneqrolu yarımmüdafiəçi Marko Yankoviçi tanıyıram. Çünki onunla birgə "Maribor"da çıxış etmişəm (2015/2016 mövsümündə Yankoviç orada "Olimpiakos"dan icarə əsasında oynayıb – red.).

– Onunla görüşə bildiniz?
– Yox. Vaxt yox idi. "Neftçi"də işləyən Ayxan Hacızadə (artıq Basketbol Federasiyasında işlədiyini xatırlatdıq – red.) ilə birgə iyunda Portuqaliyanın paytaxtı Lissabonda təlim keçmişik. Onu da görmək imkanım olmadı.

– Necə oldu ki, "Maribor"da işləmək imkanı əldə etdiniz?
– 14 il bu klubda oynamışam. Sloveniya çempionatının bombardiri, "Maribor" tarixinin ən çox qol vuran futbolçusu olmuşam. Həmçinin, Sloveniyada ən erkən qolun müəllifiyəm. 8 saniyəyə qol vurmuşam. Avropada 23 qolum var. 13 il "Maribor"un kapitan sarğısını daşımışam. Karyeramı bitirdikdən sonra klubdan soruşdular ki, nə işlə məşğul olacağam? Dedim ki, idman direktoru olmaq istəyirəm. Mənə deyildi ki, artıq bizdə bu vəzifədə olan var. Bu səbəbdən də mən idman direktorunun köməkçisi kimi işə başladım.

Səbuhi Musa