Cüdo üzrə olimpiya çempionu Hidayət Heydərov (73 kq) qazandığı reytinq xallarının sayına görə 2-cidir.

Prosport.Az xəbər verir ki, Beynəlxalq Cüdo Federasiyasının (IJF) qarışıq cədvəli həm kişilər, həm də qadınların dünya reytinqində liderlərin göstəricilərini əks etdirir.

Heydərov birləşmiş siyahıda 3-cü yerdən 2-ciyə yüksəlib. O, ikiqat olimpiya mükafatçısı və ikiqat dünya çempionu Ana-Maria Vaqnanı (Almaniya, 7132) qabaqlayıb. Cüdoçumuzun 7360 xalı var.

Bu, kişilər arasında ən yüksək göstəricidir və Hidayət Heydərov ümumi cədvəldə yalnız yapon əsilli qadın olimpiya və ikiqat dünya çempionu Krista Dequçidən (Kanada, 9790) geri qalır.

Digər olimpiya çempionumuz Zelim Kotsoyev (100 kq) topladığı xallara görə 7-ci göstəriciyə malikdir – 6112. Özü də o, beşqat olimpiya çempionu Tedi Rineri (Fransa, 5900) qabaqlayır.