Məlum olduğu kimi, Azərbaycan Elektron İdman Növləri Federasiyasının prezidenti növbəti dəfə dəyişib. Əvvəl vitse-prezident işləyən Oqtay Qasımzadə Adil Mahmudovun yerinə prezident seçilib. Adil Mahmudov isə federasiyanın Nəzarət-Təftiş Komitəsində üzv kimi fəaliyyət göstərəcək. Həmçinin, federasiyanın Kiber İdman Federasiyası adlanan vaxtında prezidenti işləmiş (2023-cü ilədək) Ramil Əliyev də İdarə Heyətində yer alacaq. O bunadək vitse-prezident idi.

Əvvəl İdarə Heyətinin üzvü olan Ənvər Hüseynov bu dəfə Nəzarət-Təftiş Komitəsinin sədri seçilib. Məmməd Əlizadə əvvəlki tək İdarə Heyətində yer alacaq.

Bəs federasiyadakı yeni şəxslər kimlərdir? Prosport.Az bunu araşdırıb.

Yeni vitse-prezident Siyavuş Hüseynov İstanbulda fəaliyyət göstərən "E Motion Yazılım E-Ticarət Robot Üretim Anonim Şirkəti"nin rəhbəridir. Bu şirkət kompüter sistemlərinin dizaynı ilə məşğul olur və bununla əlaqəli xidmətlər göstərir.

İdarə Heyətinin yeni üzvünün biri Hadı Rəcəblidir. O, ötən il vəfat etmiş millət vəkili Hadı Rəcəblinin nəvəsidir.

Nəzarət-Təftiş Komitəsinin üzvü Fərid Azayev isə mətbuatda müğənni Rəqsanə İsmayılovanın sevgilisi kimi və Baş Dövlət Yol Polis İdarəsinin sabiq əməkdaşı kimi tanınıb. O, 2018-ci ildə Bakı Ağır Cinayətlər Məhkəməsinin hökmü ilə məhkumluq həyatı da yaşayıb və vaxtından erkən azadlığa buraxılıb.

Qeyd edək ki, 2 il əvvəl – 2023-cü ilin fevralın 21-də Adil Mahmudov bu federasiyaya prezident seçilərkən, Oqtay Qasımzadə də vitse-prezident postunu tutmuşdu.