Azərbaycan Elektron İdman Növləri Federasiyası İctimai Birliyinin ümumi yığıncağı keçirilib.

Prosport.Az xəbər verir ki, Gənclər və İdman Nazirliyinin inzibati binasında keçirilən tədbir Dövlət Himnimizin səsləndirilməsi ilə başlanıb. Əvvəlcə gənclər və idman naziri Fərid Qayıbov konfrans iştirakçılarını salamlayaraq onlara uğurlar arzulayıb.

Tədbirdə federasiya prezidenti Adil Mahmudov çıxış edərək tarixi gənc olan idman növü haqqında məlumat verib, keçirilmiş yarışlar haqqında danışıb. Bu idman növünün inkişafı üçün əlindən gələni etdiyini bildirərək istefa verib və yeni seçiləcək federasiya rəhbərliyinə uğurlar arzulayıb.

Sonra Azərbaycan Elektron İdman Növləri Federasiyasının İcraiyyə Komitəsinə yeni seçkilər keçirilib. Səsvermənin nəticələrinə əsasən, növbəti 4 il müddətinə Oqtay Qasımzadə federasiyanın prezidenti, Siyavuş Hüseynov vitse-prezidenti, Hadı Rəcəbli, Ramil Əliyev və Məmməd Əlizadə İdarə Heyətinin üzvləri seçilib. Daha sonra Nəzarət-Təftiş Komitəsinə seçkilər keçirilib. Ənvər Hüseynov sədr, Fərid Azayev və sabiq prezident Adil Mahmudov isə üzv seçilib. Sonda Oqtay Qasımzadə çıxış edərək göstərilən etimada görə təşəkkür edib.

Qeyd edək ki, 2 il əvvəl – 2023-cü ilin fevralın 21-də Adil Mahmudov bu federasiyaya prezident seçilərkən, Oqtay Qasımzadə də vitse-prezident postunu tutmuşdu.