Portuqaliyanın Odivelaş şəhərində keçirilən yeniyetmə cüdoçular (U-18) arasında Avropa çempionatında Azərbaycan idmançıları tarix yazmağı bacardılar. Fərdi yarışlarda 6 qızıl və 3 bürünc medal qazanan cüdoçularımız uğuru qarışıq komanda yarışlarında da təkrarladı. Komandamız Niderland, Almaniya və İtaliyaya qalib gəldi. Fransadan isə ötənilki dünya çempionatının finalındakı bəxtsiz məğlubiyyətin əvəzi çıxıldı.
Prosport.Az yeniyetmə cüdoçulardan ibarət oğlanlar millimizin baş məşqçisi Rüstəm Alimlidən bu uğur barədə müsahibə götürüb.
– Mükəmməl nəticə ilə yadda qaldınız. İlkin olaraq sevinc təəssüratlarınızı bölüşərdiniz...
– Biz ötən il Xorvatiyanın Poreç şəhərində keçirilmiş Avropa çempionatında da oğlanlarda medal sayında 1-ci olmuşduq. 2 qızıl və 4 bürünc medal qazanmışdıq. Qızlarda isə 1 qızıl və 1 bürünc medal olmuşdu. Biz bu yarışadək 3 güclü turnirdə iştirak etmişdik. O turnirlər vasitəsilə Avropa və dünya çempionatları üçün yığmanın tərkibini müəyyənləşdirməli idik. Həmin Avropa Kuboku turnirlərinin birində 3, birində 6, digərində isə 5 qızıl medal qazanmışdıq. Bu yol göstərirdi ki, builki Avropa çempionatı bizim üçün uğurlu olacaq. Amma səmimi deyim ki, nə qədər gözlənilən olsa da, belə nəticə gözləmirdik.
– İlk dəfə qarışıq komanda yarışında Avropa çempionu olduq. Bu barədə nə deyə bilərsiniz?
– Əslində bu da sürpriz olmadı. Ötən ilki Avropa çempionatının komanda yarışında 3-cü yerə çıxmışdıq. Keçən il Bosniya və Herseqovinanın paytaxtı Sarayevoda keçirilmiş dünya çempionatında isə həmin bu Fransa ilə yenə finalda qarşılaşmışdıq. Orada kor püşklə uduzduq. Belə ki, hesab bərabər olduğundan, püşk atıldı. Püşk 63 kq çəki dərəcəsində zədəli olan Avropa çempionumuz Fidan Əlizadəyə düşdüyündən, o, tatamiyə çıxa bilmədi və bizə texniki məğlubiyyət verildi. Biz isə Fransadan revanşı bu Avropa çempionatının finalında aldıq. Özü də yenə püşklə qalib müəyyənləşdi. 60 kq-da Avropa çempionumuz Məhəmməd Musayev qalib gələrək hesabı 3:3 etdi. Məhəmməd rəqibinə "Uri naqe" fəndi ilə qalib gəldi və rəqibi nokdauna düşdü. Həkimlər onu apardılar. Püşk yenə 60 kq çəki dərəcələrindəki idmançıların güləşməli olduğunu müəyyənləşdirdi. Ancaq həmin çəkidə idmançıları zədələndiyindən, müəllimləri dedi ki, mən idmançımı yarışa çıxarmayacağam. Ona görə də qələbə 4:3 hesabı ilə bizə verildi. Belə bir dramatik hal yaşandı. Komanda yarışı bizdə stabil gedir. Amma çempionluq yox idi. Bu yarışda nöqtəni qoyaraq onu da tamamladıq. Məhəmməd Musayev və Ramazan Əhmədov ikiqat Avropa çempionu oldular.
– Qarşıda hansı yarışlara getməyi planlaşdırırsınız?
– İrəlidə 3 rəsmi yarış var. Gələn ay Sloveniyanın Maribor şəhərində təşkil olunan Avropa Olimpiya Gənclər Festivalında çıxış edəcəyik. Avqustda Belarusda keçiriləcək II MDB Oyunlarında (cüdo yarışları Qomel şəhərində keçiriləcək – S.M.) və Xorvatiyanın paytaxtı Zaqrebdə baş tutacaq dünya çempionatında yarışacağıq.
– Oğlanlarda 5 qızıl və 2 bürünc medal olduqca əla nəticədir. Bəlkə də "böyüklər"də nəticələrin qənaətbəxş olmaması səbəbindən bu sualı verməkdə tələsirəm. Ancaq soruşacağam. Bu uşaqlardan kimsə əsas yığmada çıxış etmək gücünə malikdir?
– Yox, indi bunu demək fantastika olar. Amma burda bir neçə idmançı var ki, 2028-ci ildə keçiriləcək Los Anceles Olimpiadasına rahat lisenziya qazanıb, orda nəticə verə bilərlər. Bu nəsil çox güclü, perspektivli və istedadlıdır. Əgər bu idmançılar gənclərdə də dünya və ya Avropa çempionu olsalar, artıq bu onun əsas yığmaya cəlb olunması üçün siqnal olacaq.
– Ötən ilin aprelində bu milliyə baş məşqçi təyin olundunuz. Gördüyünüz işlər göz qabağındadır. İndi zirvədə ikən, bu zirvəni qoruyub saxlamaq çətin olacaq. İdmançıların arxayınlaşmaması, ulduz xəstəliyinə tutulmaması üçün hansı tədbirlər görməyi planlaşdırırsınız?
– İndi federasiya elə edib ki, hətta təlim-məşq toplanışları zamanı psixologiya, ingilis dili müəllimləri gəlib onlara dərs keçir. Komandada elə ab-hava var ki, nizam-intizamı zəif olan idmançı özü komandaya qatılmaq istəmir. Federasiya prezidenti Rəşad Nəbiyev mənə ötən il tapşırıq verib ki, əsas idmançıların əxlaq və intizamı ilə bağlı məsələlərə diqqət edim. Nəticə isə bundan sonra özü gələcək. Praktika göstərir ki, bir dəfə nəticə verən idmançı rejimə, nizam-intizama əməl etməyib deyə, uğurunun davamını gətirə bilməyib. Biz indidən bu uşaqların fundamentində intizam məsələlərini düzəltməliyik ki, onlar "böyüklər"ə keçdikdə bu problemlə üzləşməsinlər. İndiki halda komandada bu baxımdan hər şey yaxşıdır. Bu da nəticələrdə özünü göstərir. Biz də istəyirik ki, "böyüklər"də bir yox, bir neçə dünya çempionumuz olsun.
Səbuhi Musa