Dünən Bakıda keçirilən "Böyük Dəbilqə" yarışında Azərbaycan cüdosunun ən parlaq simalarının çıxdığı 73 kq-da 2 medalçımız oldu.

Olimpiya və dünya çempionu Hidayət Heydərovun yoxluğu bu çəkidə hiss olunmadı. Prosport.Az həm gümüş medalla kifayətlənən Rəşid Məmmədəliyev, həm də bürünc mükafat qazanan Vüsal Qələndərzadənin fikirlərini öyrənib.  

Rəşid Məmmədəliyev: "Böyük Dəbilqə"nin öz vətənimizdə keçməsi bizə yaxşı əhval-ruhiyyə verdi. Bu səbəbdən uğur qazandıq. Mən 2-ci yerə, millidə və klubdakı komanda yoldaşım Vüsal Qələndərzadə 3-cü yerə çıxdı. Bu yarışa yaxşı hazırlaşmışdım. Bundan əvvəl Parisdəki "Böyük Dəbilqə"də çıxış etmişdim. Daha sonra orada keçirilən təlim-məşq toplanışından yetərincə yararlandıq. 2-ci görüşümdə (italiyalı Manuel Parlati ilə görüşü nəzərdə tutur – red.) zədələndim. Finalda güləşmək niyyətim vardı. Həkimlərlə danışdıq, güləşməməyim məsləhət bilindi. Gələcək yarışlarda daha böyük problem olmasın deyə, güləşməməyim istənildi. 73 kq-da rəqabət var. Bunun olması daha yaxşıdır. O zaman daha yaxşı inkişaf etmək mümkündür".

Vüsal Qələndərzadə: "Hədəfim yaponiyalı rəqibimə (Tatsuki İşiharanı nəzərdə tutur – red.) qalib gələrək finala çıxmaq idi. Qismət olmadı. Açığı, yaxşı formada idim. Qalib gələcəyimi gözləyirdim. Bundan sonrakı yarışda özümdən qızıl medal gözləyirəm. Ancaq buna da şükür olsun ki, 3-cü yeri tutub medalsız qalmadım. Bürünc medal uğrunda görüşdə rəqibimin (yaponiyalı Ryuqa Tanakanı nəzərdə tutur – red.) gənclər arasında dünya çempionu olması mənə heç bir həyəcan yaşatmırdı. Çünki onu tanıyırdım, necə güləşdiyini bilirdim. 73 kq-da Hidayət Heydərov kimi olimpiya və dünya çempionu olsa da, çəkimi dəyişmək barədə düşünmürəm".